Një pjesëmarrje në një spektakël televiziv mund t’i kushtojë shtrenjtë një oficereje të Forcave Ajrore të Ukrainës. Viktoria Kuznetsova është vënë nën hetim penal, pasi dyshohet se ka përdorur dokumente të rreme për të justifikuar mungesën nga shërbimi ushtarak, ndërkohë që ishte e angazhuar në xhirimet e “MasterChef Ukraine”.
Sipas autoriteteve ukrainase, togerja e lartë dyshohet se ka përfituar në mënyrë të padrejtë rreth 250 mijë hryvnia nga pagat dhe shtesat ushtarake, ndërsa për muaj të tërë nuk ka qenë e pranishme në repartin ku shërbente.
Ngjarja lidhet me periudhën prill-gusht 2025. Në dokumentacionin zyrtar, Kuznetsova rezultonte e shtruar në një spital ushtarak në qytetin e Dnipros, ku pretendohej se po merrte trajtim mjekësor. Por, sipas hetuesve, realiteti ishte krejt ndryshe.
Gjatë këtyre muajve, ajo dyshohet se ka udhëtuar në disa qytete të Ukrainës, përfshirë Kievin, Kharkivin dhe zonën e Odesës. Madje, nga 22 prilli deri më 11 gusht, ka qenë e angazhuar në xhirimet e sezonit të 16-të të “MasterChef Ukraine”, në kryeqytetin ukrainas.
Pavarësisht mungesës nga detyra, pagesat e saj ushtarake kanë vijuar të kryhen normalisht. Kjo ka sjellë një dëm financiar prej afro 250 mijë hryvnia për shtetin, sipas vlerësimit të hetuesve.
Një spektakël televiziv zbuloi dyshimet ndaj saj
Çështja mori vëmendje publike në mars të vitit 2026, pasi Kuznetsova u shfaq në materialet promovuese të spektaklit, ku ishte prezantuar si ish-ushtarake. Pamjet ngritën pikëpyetje, pasi ajo dyshohej se vazhdonte të ishte pjesë aktive e Forcave Ajrore.
Pas këtij zbulimi, komanda e Skuadronit të 15-të të Aviacionit të Transportit nisi një verifikim të brendshëm. Sipas rezultateve të tij, oficerja kishte marrë pjesë në produksionin televiziv pa informuar eprorët dhe pa siguruar autorizimin e nevojshëm.
Materialet e mbledhura iu referuan më pas Byrosë Shtetërore të Hetimit, e cila ka nisur procedimin penal. Në fokus të verifikimeve është edhe spitali ushtarak ku ajo figuron si paciente. Hetuesit po përpiqen të zbulojnë nëse personeli mjekësor ishte në dijeni të mungesave të saj dhe nëse dikush ka ndihmuar në mbajtjen e dokumentacionit që justifikonte shtrimin në spital.
Deri tani nuk është konfirmuar nisja e procedimit penal ndaj ndonjë punonjësi të spitalit.
Kuznetsova dyshohet për shmangie të shërbimit ushtarak përmes mashtrimit gjatë gjendjes së luftës, si dhe për mashtrim me pasoja të konsiderueshme financiare. Në rast se shpallet fajtore për akuzat, ajo rrezikon një dënim deri në 10 vite burg.
Pas publikimit të lajmit në mars, oficerja reagoi edhe në Instagram, ku deklaroi se nuk ishte dënuar dhe as nuk ishte shpallur në kërkim. Ky reagim erdhi përpara se autoritetet të njoftonin zyrtarisht nisjen e hetimit penal.
Për momentin, çështja është ende në fazën paraprake dhe nuk ka një vendim gjykate që të vërtetojë fajësinë e saj. Rasti ka shkaktuar interes të madh në Ukrainë, veçanërisht për shkak të situatës së luftës me Rusinë dhe rëndësisë që ka përmbushja e detyrimeve ushtarake.
Burimi: bordo.al
