Një dokument i mbajtur larg vëmendjes publike për katër vite ka rikthyer në qendër të diskutimit jetën private të Brigitte Bardot. Bëhet fjalë për një letër të shkruar në vitin 2022, në të cilën legjenda e kinemasë franceze shprehte hapur zhgënjimin dhe dhimbjen që, sipas saj, kishte përjetuar gjatë martesës me Bernard d’Ormale.
Në rreshtat e saj, aktorja përdorte fjalë të forta për t’iu drejtuar bashkëshortit, me të cilin kishte ndarë jetën për më shumë se tri dekada. “Për 30 vjet, më ke shkatërruar me durim, ditë pas dite”, shkruante Bardot, duke e akuzuar për mungesë dashurie dhe mbështetjeje emocionale.
Një marrëdhënie e kërkuar me ngrohtësi
Letra, e publikuar nga gazeta franceze Le Figaro, zbulon dëshirën e aktores për një marrëdhënie ku të gjente ngrohtësi, përkujdesje dhe një partner që të ishte pranë saj edhe në momentet më të vështira. Në një pjesë tjetër të mesazhit, Bardot shprehte se kishte arritur kufirin e durimit, pavarësisht gjithçkaje që kishte dhënë në këtë marrëdhënie.
“Të dhashë gjithçka. Dashurinë time dhe nevojën për të pasur pranë një njeri që do të më donte, do të ndante gëzimet dhe dhimbjet e mia, që do të ishte i lumtur me mua edhe duke pirë një kafe apo një gotë verë të kuqe me miqtë. Doja dikë që të më shoqëronte në udhëtimet e fundit të jetës dhe të buzëqeshte për gjithçka që jeta mund t’i ofronte”, thuhej në letrën e cituar edhe nga The Times.
Pavarësisht këtyre deklaratave, çifti qëndroi së bashku deri në fund të jetës së aktores, e cila u nda nga jeta në moshën 91-vjeçare, në dhjetor të vitit të kaluar. Megjithatë, sipas testamentit të saj, bashkëshorti nuk përfitoi nga trashëgimia, ndërsa pas vdekjes së saj u detyrua të largohej nga vila e famshme La Madrague në Saint-Tropez.
Reagimi i avokatës dhe pyetjet për letrën
Publikimi i letrës ka shkaktuar reagimin e avokates së d’Ormale, Aurélie-Caroline Vieugué, e cila ka shprehur rezerva për vërtetësinë e dokumentit. Ajo deklaroi se klienti i saj ishte tronditur nga përmbajtja dhe se nuk kishte pasur dijeni për ekzistencën e kësaj letre.
Avokatja vuri në dukje edhe një detaj që, sipas saj, ngre pikëpyetje: Bardot kishte zakon t’i nënshkruante letrat e saj me një margaritë, ndërsa në dokumentin e publikuar kjo shenjë mungon. Megjithatë, ajo nuk pretendoi se letra ishte e falsifikuar.
Gara për pronën në Saint-Tropez
Përplasjet mes bashkëshortit dhe njerëzve që administrojnë trashëgiminë e aktores janë bërë edhe më të forta për shkak të pronës në Saint-Tropez. Sipas fondacionit të Brigitte Bardot, testamenti parashikonte që d’Ormale të mos vazhdonte të jetonte në vilën La Madrague, ndërsa pjesa më e madhe e pasurisë do t’i kalonte fondacionit të krijuar prej saj për mbrojtjen e kafshëve. Pjesa tjetër i ishte lënë djalit të saj, Nicolas-Jacques Charrier.
Nga ana tjetër, ish-bashkëshorti nuk e ka fshehur pakënaqësinë për largimin nga prona ku pretendon se ka jetuar për 35 vite. “Kam jetuar atje për 35 vjet dhe më kanë dëbuar”, është shprehur ai.
Fondacioni, megjithatë, këmbëngul se vila është pronë e organizatës që prej vitit 1992. D’Ormale, i cili kishte drejtuar për një periudhë më pak se njëvjeçare edhe fondacionin, u largua nga ky pozicion në muajin shtator.
Kështu, përtej trashëgimisë së saj artistike, emri i Brigitte Bardot vazhdon të jetë në qendër të vëmendjes edhe pas vdekjes, këtë herë për shkak të një letre personale, marrëdhënies së trazuar me bashkëshortin dhe betejës për pronën ku kaloi një pjesë të madhe të jetës.
Burimi: bordo.al
