Kalo te përmbajtja

Lajme të shpejta, të verifikuara dhe të paanshme

Lajm i fundit
Politikë

Asambleja e PS e largon Spiropalin? Malaj: Çështje e brendshme

Asambleja e PS e largon Spiropalin? Malaj: Çështje e brendshme
Foto: shqiptarja.com

Elisa Spiropali jashtë grupit parlamentar apo jashtë Partisë Socialiste? Këto janë pyetjet e një prej temave ‘më të nxehta’ të politikës ditët e fundit pas mbledhjes së së shtunës të Asamblesë së PS.

Mbledhja e PS dhe kërkesa për përjashtimin e Spiropalit

Mbledhja e socialistëve u mbyll pa votim për kërkesën e Edi Ramës për përjashtimin e saj, ndërsa pas mbledhjes Sekretari i Përgjithshëm, Blendi Klosi, tha vetëm se “është anëtare e PS.”

Në mënyrë të ngjashme shprehet edhe zv.kryetari i grupit, Erion Malaj gjatë diskutimit në “Repolitix” në Report Tv, i cili tha vetëm se bëhet fjalë për çështje të brendshme.

“Janë çështje të brendshme që nëse nuk do të ishin kështu do të ishin publikuar në livestream. Ne kemi një statut, rregullat tona dhe strukturat drejtuese, nëse do të ketë nevojë, Kryesia ose grupi do të dalin me vendimmarrje formale, por në këtë moment që flasim nuk kemi asgjë për të komentuar për çështje të brendshme të familjes socialiste”, tha Malaj.

“Fokusi i Asamblesë janë zgjedhjet”, tha më tej Malaj.

I pyetur edhe për shqetësimet e Pandeli Majkos lidhur me 1000 orë filmime erotike në duart e Ergys Agasit që përflitet se janë edhe anëtarë të PS, Malaj iu shmang komenteve të drejtpërdrejta. Sa për votën e Spiropalit për buxhetin 2027, i beson të përbashkëtës.

Erion Malaj: Majko mbajti qëndrimet e tij për situatën dhe çështje që i konsideron të rëndësishme për PS. Për sa kohë ato diskutime kanë qenë të mbyllura, kemi pasur nevojë t’i diskutojmë me anëtarësinë.

-E prisni votën e Spiropalit për buxhetin?
Erion Malaj: Ne që jemi aty në atë krah, jemi të gjithë socialistë.

Kandidaturat për Bashkinë e Tiranës

Albana Koçiu dhe Ervin Demo janë vendosur bashkryetarë të PS në Tiranë duke lënë të hapur mundësinë që të jenë kandidatë për bashkinë e Tiranës. Këtë opsion nuk e përjashton as zv.kryetari i grupit, Erion Malaj.

“Kandidat mund të jetë kushdo që e gjykon të arsyeshme PS. Kandidatë jemi të gjithë”, shprehet ai për “Repolitix” në Report Tv.

Të dy këta emra, gazetari Kujtim Topuzi i sheh si një reflektim të ndikimit të protestave te kryeministri Edi Rama.

“Demo është një kandidaturë që Rama do ta donte si kandidat, por do ta shikojë në bazë të pëlqyeshmërisë. Emërimi i Koçiut tregon sa ndikim ka pasur protesta në vendimet e Ramës. Është një lloj shpërblimi”, thotë Topuzi.

Ndërsa për Migen Qiraxhin, nga Qëndresa Qytetare, ndryshimi në kryeqytet mund të ndodhë vetëm nëse opozita del me një kandidat të përbashkët. Por, Sali Berisha duhet të qëndrojë larg sepse e pengon këtë qëllim.

“Në këto zgjedhje, sidomos në Tiranë, ekziston potenciali për ndryshime të mëdha, por kjo mund të ndodhë vetëm nëse faktori opozitar bashkohet rreth një kandidati të vetëm. Partia Socialiste është në një pozicion të dobët në kryeqytet. Përballë saj, opozita ka mundësinë të përfitojë nga pakënaqësia qytetare, por duhet të tregojë maturi dhe aftësi për të krijuar kohezion për të absorbuar energjitë e reja. Berisha është një figurë që e pengon por mund të ketë kohë për ta zëvendësuar, të marrë energji nga protesta ose të përbashkojë partitë e vogla”, tha Qiraxhi.

Tensionet brenda Asamblesë

Diskutimet pa praninë e kamerave në Asamblenë e Partisë Socialiste të shtunën kanë qenë me tone të tensionuara. Gazetari Kujtim Topuzi shprehet për “Repolitix” në Report Tv se kryesocialisti Edi Rama e ka vënë theksin te mungesa e unifikimit dhe reagimeve lidhur për protestën.

Madje, ai u ka thënë disa socialistëve se “janë kënaqur” nga reagimet negative që ka marrë Taulant Balla, i cili ka postuar vazhdimisht për protestën.

“Në këtë mbledhje, e cila ka qenë një prej mbledhjeve me tone më të larta ndonjëherë në Partinë Socialiste, në mos më e tensionuara prej të gjithave, Rama i ka kërkuar llogari pjesës më të madhe të anëtarëve të Asamblesë për mosmbështetjen dhe mosunifikimin e të gjithë anëtarëve socialistë. Në lidhje me protestën, ka një batutë që e ka thënë. Ne e dimë të gjithë që Taulant Balla ka qenë një prej protagonistëve më të spikatur në kundërshtimin dhe anatemimin e protestës, sidomos me postime në Facebook. Rama, për shembull, u është drejtuar disa anëtarëve të Asamblesë dhe u ka thënë: Ju jeni kënaqur nga ato komentet negative që ka marrë Balla në Facebook për shkak të kësaj. Ideja e kryeministrit ka qenë që nuk kanë qenë të unifikuar dhe nuk kanë reaguar në nivelin e duhur”, tha Topuzi.

Burimi: shqiptarja.com

Të fundit Të gjitha