Ambasadorja e BE-së në Shqipëri, Sofia Moreira de Sousa, ka zhvilluar takimin e saj të parë me bashkëkryetarët e Komisionit të Posaçëm Parlamentar për Reformën Zgjedhore, Damian Gjiknuri dhe Oerd Bylykbashi. Takimi u fokusua te procesi i reformës zgjedhore, ndërsa ambasadorja theksoi se cilësia e reformës është po aq e rëndësishme sa edhe koha kur ajo realizohet.
Afati i ngushtë dhe fushëveprimi i reformës
Gjatë bisedimeve u diskutua afati shumë i ngushtë kohor brenda të cilit duhet të punojë Komisioni, si dhe çështje që lidhen me fushëveprimin, prioritetet dhe gjithëpërfshirjen e reformës.
Rëndësia e reformës për besimin publik
“Cilësia e reformës zgjedhore është po aq e rëndësishme sa edhe koha kur ajo realizohet. Zhvillova takimin tim të parë me bashkëkryetarët e Komisionit të Posaçëm Parlamentar për Reformën Zgjedhore, Damian Gjiknuri dhe Oerd Bylykbashi.
Diskutuam për afatin shumë të ngushtë kohor brenda të cilit duhet të punojë Komisioni, si dhe për çështje që lidhen me fushëveprimin, prioritetet dhe gjithëpërfshirjen e reformës.
Reforma zgjedhore ka të bëjë me besimin e publikut, konkurrencën e ndershme dhe integritetin e zgjedhjeve. Ajo është gjithashtu pjesë e rrugëtimit të Shqipërisë drejt BE-së. Rekomandimet e OSBE/ODIHR-it kanë qenë prej kohësh të qarta dhe puna e përbashkët e kryer deri më tani duhet të japë rezultate konkrete.
Me vullnet politik dhe dialog të sinqertë nga të gjitha palët, kjo është e arritshme”, shkruan ambasadorja e BE-së, Sofia Moreira de Sousa.
Burimi: kohajone.com
