Të shtunën e 14 nëntorit mblidhet Asambleja e Partisë Socialiste, ku priten zhvillime të rëndësishme në mes të protestave anti-qeveritare në Tiranë. Mbledhja pritet të mbahet në Gjirin e Lalzit dhe kryebashkiaku i Tiranës, Erjon Veliaj, kërkon të marrë pjesë, pasi është anëtar i Asamblesë, i Kryesisë së PS-së dhe një prej drejtuesve politikë të Tiranës.
## Kërkesa drejtuar SPAK-ut dhe Blendi Klosit
Veliaj, i cili ndodhet në paraburgim në Durrës, ia drejton të parën kërkesë SPAK-ut: t’i garantohet pjesëmarrja fizike në mbledhje, ose nëse kjo nuk është e mundur, t’i lejohet të marrë pjesë me video-konferencë.
Kërkesën e dytë ia drejton Sekretarit të Përgjithshëm të PS, Blendi Klosi, në një kohë kur nga burgu ka nisur një luftë e hapur me kryeministrin Edi Rama. Veliaj kërkon të njoftohen zyrtarisht ora, vendi, rendi i ditës dhe dokumentet që do të shqyrtohen.
> “Të më njoftohen zyrtarisht ora, vendi, rendi i ditës dhe dokumentet që do të shqyrtohen në mbledhjen e datës 14 nëntor”.
Ai synon të marrë fjalë, jo vetëm të ndjekë mbledhjen si spektator. Sipas tij, do të paraqesë personalisht qëndrimet, propozimet dhe kërkesat për funksionimin e partisë dhe për ardhmen e organizatës.
## Argumentet e letrës
Në shkresën zyrtare, Veliaj thekson se kufizimi i lirisë së lëvizjes nuk duhet ta privojë nga ushtrimi i të drejtave politike. Ai përmend nenet 17 dhe 46 të Kushtetutës dhe nenin 11 të Konventës Evropiane për të Drejtat e Njeriut, sipas të cilave kufizimet e këtyre të drejtave duhet të kenë bazë ligjore dhe të respektojnë parimin e proporcionalitetit.
Ai shton se kërkesa nuk synon ndryshimin apo shmangien e masës së sigurimit, por vetëm gjetjen e një mënyre proporcionale për ushtrimin e së drejtës politike. Nëse ndonjë kufizim apo refuzim vendoset, Veliaj kërkon që ai të arsyetohet dhe të shqyrtohet alternativa e pjesëmarrjes në distancë.
Veliaj kërkon që kërkesa të shqyrtohet me urgjencë, sepse pa një përgjigje përpara mbledhjes, ushtrimi i së drejtës së tij do të ishte praktikisht i pamundur.
Burimi: shqiptarja.com
