Presidentja e Republikës së Kosovës, Justina Shiroka Pula, mori pjesë në pritjen e organizuar nga Ambasada e Belgjikës në Kosovë me rastin e shënimit të Ditës së Mbretit të Belgjikës.
Presidentja Shiroka Pula, në fjalën e saj para të pranishmëve, tha se për Kosovën Belgjika është shtet mik, i cili qëndroi pranë nesh në momentet më të vështira të historisë sonë.
Ajo shtoi se populli ynë nuk e harron solidaritetin e Belgjikës gjatë luftës së viteve 1998–1999, as qëndrimin e saj parimor në mbështetje të ndërhyrjes së NATO-s për mbrojtjen e jetës dhe dinjitetit njerëzor. Sipas saj, ky solidaritet do të mbetet gjithmonë pjesë e kujtesës sonë kolektive.
Mbështetja e Belgjikës pas njohjes së pavarësisë
Presidentja Shiroka Pula theksoi se Belgjika, që nga njohja e pavarësisë së Kosovës, ka mbështetur vazhdimisht shtetndërtimin, zhvillimin demokratik dhe rrugëtimin tonë euroatlantik.
Marrëdhëniet dhe mërgata në Belgjikë
Sipas saj, marrëdhëniet ndërmjet dy vendeve po forcohen edhe më shumë. Ajo theksoi se një urë e veçantë mes tyre është mërgata e Kosovës në Belgjikë. Presidentja tha gjithashtu se të dy shtetet kanë potencial të madh për ta thelluar bashkëpunimin ekonomik, arsimor, kulturor dhe institucional.
Belgjika si partnere evropiane
Në fund, Presidentja Shiroka Pula theksoi se Kosova e sheh Belgjikën si partnere të rëndësishme në rrugëtimin e saj evropian.
KultPlus.com
Burimi: kultplus.com
