Artisti Driton Selmani ka prezantuar në Kino Armata projektin e tij të ri artistik “A Whisper (Beyond Dreams)”, një instalacion audiovizual që trajton politikën e kujtesës dhe mënyrën se si ndërtohen, përsëriten dhe pranohen narrativat historike si të vërteta.
Pikënisja e veprës
Pikënisja e veprës është fjalimi i shkrimtarit austriak Peter Handke në funeralin e ish-presidentit serb Slobodan Milošević. Përmes ndërthurjes së zërit, imazhit dhe muzikës, Selmani shqyrton marrëdhënien mes fjalës publike, kujtesës kolektive dhe mënyrës se si formësohet historia.
Projekti është realizuar në bashkëpunim me artistin, kompozitorin dhe producentin Filippos Raskovic, ndërsa në pjesën muzikore kanë kontribuar trumbetistët Tristan Halilaj dhe Fisnik Behluli.
Prezantimi në Kino Armata
Prezantimi në Kino Armata përfshiu performancën live të dy kompozimeve muzikore, prezantimin e një edicioni të kufizuar të vinylit, si dhe një bisedë me Driton Selmanin, Filippos Raskovic dhe Besa Lucin, të moderuar nga Qerim Ondozi.
Projekti “A Whisper (Beyond Dreams)” është realizuar me mbështetjen e Ministrisë së Kulturës dhe Turizmit./KultPlus.com
Burimi: kultplus.com
