Nga Irena Beqiraj
Pragu ideal për t’u regjistruar në TVSH varet nga mënyra se si është ndërtuar ekonomia, nga kostot administrative që kërkon mbledhja e kësaj takse, nga barra që përballojnë bizneset e vogla për të përmbushur detyrimet, si dhe nga të ardhurat që shteti do të humbiste nëse ky prag nuk do të vendosej fare.
Tani Ministria e Financave duhet të shpjegojë pse e ka vlerësuar si ideal pragun prej 5 milionë lekësh. Me fjalë të tjera, a janë të ardhurat që do të mblidhen më të mëdha se kostot e administrimit dhe të përmbushjes së detyrimeve?
Efekti i një pragu më të ulët
Një prag më i ulët për TVSH-në nuk sjell domosdoshmërisht një performancë më të mirë tatimore. Në të vërtetë, ai mund ta bëjë mbledhjen e taksave më pak efikase, kur mijëra biznese shumë të vogla detyrohen të plotësojnë kërkesat e një takse mjaft komplekse.
Ndërkohë, Fondi Monetar Ndërkombëtar ka rekomanduar një prag tjetër për Shqipërinë. Në raportin e vitit 2022 mbi asistencën teknike për sistemin tatimor shqiptar, FMN-ja rekomandoi një prag TVSH-je prej 8,000,000 lekësh.
FMN-ja propozoi këtë strukturë:
Bizneset me xhiro vjetore nën 5 milionë lekë duhet të qëndrojnë jashtë regjistrimit në TVSH;
Për xhiron 5–8 milionë lekë, regjistrimi të ishte vullnetar;
Për xhiron mbi 8 milionë lekë, regjistrimi të ishte i detyrueshëm.
Kufizimi i regjistrimit vullnetar synonte gjithashtu të zvogëlonte rrezikun e faturave fiktive dhe të kërkesave mashtruese për rimbursim të TVSH-së.
Argumenti i FMN-së
Thelbi i argumentit të FMN-së lidhej me faktin se efikasiteti i TVSH-së në një vend ku 33% e bizneseve realizojnë 94% të të ardhurave buxhetore nga TVSH-ja nuk rritet duke shtuar bizneset që detyrohen të regjistrohen, pra duke e ulur kufirin nën 8 milionë lekë. Një hap i tillë nuk siguron rritje të të ardhurave neto nga TVSH-ja, por shton kostot e administrimit dhe të përmbushjes së detyrimeve.
Burimi: gazetashqiptare.al
