Sipas raportimeve të fundit, Shtetet e Bashkuara kanë kryer një sulm kundër një objekti të lëshimit të raketave që i përket Gardës Revolucionare Islamike (IRGC) në ishullin Qeshm, në pjesën jugore të Iranit. Paralelisht, mediat iraniane kanë njoftuar për shpërthime dhe aktivizim të sistemeve të mbrojtjes ajrore në rajonin më të gjerë të Ngushticës së Hormuzit.
Shpërthimet pranë aeroportit Bandar-e Jask
Burimet lokale të medias bëjnë me dije se shpërthime janë dëgjuar pas mesnatës në afërsi të aeroportit Bandar-e Jask, i cili ndodhet gjithashtu në jug të Iranit, megjithëse nuk janë dhënë hollësi të tjera për këtë ngjarje.
Ndërkohë, agjencia iraniane e lajmeve Tasnim ka bërë të ditur se Garda Revolucionare ka kapur një avion luftarak të armikut mbi ishullin Qeshm dhe e ka detyruar atë të tërhiqet nga zona.
Raportimet e agjencisë Fars për Ngushticën e Hormuzit
Edhe agjencia e lajmeve Fars ka raportuar se disa shpërthime u dëgjuan pranë Ngushticës së Hormuzit, gjatë lëshimit të raketave tokë-ajër kundër avionëve luftarakë amerikanë.
Deri në këtë moment, informacionet për një sulm amerikan nuk janë verifikuar në mënyrë të pavarur, ndërsa nuk dihet ende nëse ka pasur viktima apo dëme materiale si pasojë e këtyre incidenteve.
Burimi: euronews.al
