Të paktën 300 shkolla në të gjithë Italinë u evakuuan të mërkurën, pasi morën njoftime për vendosjen e bombave përmes postës elektronike.
Kërcënimi ndaj kryeministres
Në emailin kërcënues përfshihej edhe një kërcënim i drejtpërdrejtë ndaj kryeministres italiane, Giorgia Meloni, bëri të ditur ministri i Arsimit i Italisë.
Mesazhi niste me fjalët: “Kemi ardhur për t’ju shfarosur. Do të kryejmë gjenocid ndaj italianëve.”
Në të thuhej se në ndërtesë ishte vendosur një “pajisje shpërthyese e fuqishme”, e cila do të aktivizohej përmes një “mekanizmi në distancë”.
“Ne kemi vendosur një bombë në motorin e makinës së kryeministres suaj”, vijonte emaili, i cili ishte nënshkruar me emrin “Mikhail Andropov, udhëheqës i Vilajatit të Mizogjinisë”.
Kërcënime të ngjashme në Evropë
Kërcënime të ngjashme për vendosjen e bombave, të marra gjatë javës së kaluar nga media në Irlandë dhe Bullgari, ishin dërguar gjithashtu në emër të personit që pretendonte se quhej “Mikhail Andropov”.
Reagimi i qeverisë italiane
Ministri italian i Arsimit, Giuseppe Valditara, tha se në të gjithë Italinë ishin regjistruar rreth 300 kërcënime, duke shtuar se “është e qartë se bëhet fjalë për një strategji”.
Përmbajtja e email-eve ende nuk është verifikuar, ndërsa autoritetet po kryejnë kontrolle sigurie për të garantuar mbrojtjen e nxënësve, mësuesve dhe personelit të shkollave.
Edhe ministri italian i Mbrojtjes, Guido Crosetto, reagoi lidhur me incidentin, duke njoftuar se do të raportojë në Parlament për situatën dhe çështjet që lidhen me sigurinë e përgjithshme.
Ai gjithashtu deklaroi se kërcënimet për vendosjen e bombave janë pjesë e një strategjie destabilizimi.
“Është pjesë e një strategjie që tashmë është e qartë, e cila synon të përhapë terror ose të krijojë shqetësim. Secili prej nesh mundet, me mjetet dhe teknologjinë që ekzistojnë sot, t’i dërgojë një email një shkolle, një kopshti apo një kompanie ajrore, duke pretenduar se ka vendosur një bombë.”
Burimi: tirananews.al
