Jordan Dimitrovski, kryetari i Bordit të Drejtorëve të Odës Ekonomike për Teknologji Informative dhe Komunikim (MASIT), thotë se inteligjenca artificiale përdoret nga 85% e kompanive të teknologjisë së informacionit dhe komunikimit (TIK). Në sektorët e tjerë, sipas tij, përdorimi është më i kufizuar.
Në një deklaratë për “Lokalno”, Dimitrovski theksoi se kompanitë e IT-së synojnë të nxisin një përfshirje më të gjerë të inteligjencës artificiale në punën e përditshme dhe në zhvillimin e bizneseve.
Përdorimi i inteligjencës artificiale në sektorin e TIK-ut
“Statistikat tregojnë se mbi 85% e profesionistëve të IT-së në industrinë e TIK-ut përdorin inteligjencën artificiale dhe mjetet përkatëse. Në sektorët e tjerë përdorimi mund të mos jetë ende kaq i përhapur, por ne duhet t’i inkurajojmë që ta shfrytëzojnë më shumë këtë teknologji dhe të rrisin konkurrueshmërinë në tregjet vendase e globale”, u shpreh Dimitrovski.
Konferenca e 21-të e MASIT-it, e mbajtur sot, i kushtohet inteligjencës artificiale dhe zbatimit të saj në kompani. Sipas Dimitrovskit, diskutimet do të përqendrohen te mënyrat praktike për të përdorur teknologjitë dhe risitë, si edhe te ndikimi i tyre në punën dhe zhvillimin e bizneseve. MASIT synon të fuqizojë sektorin e TIK-ut dhe të nxisë transformimin ekonomik dhe konkurrueshmërinë e kompanive në vend.
Mungesa e programuesve dhe specialistëve
Dimitrovski vlerëson se inteligjenca artificiale nuk do t’i zëvendësojë inxhinierët e IT-së, pasi teknologjitë e reja kanë sjellë tashmë një kategori tjetër programuesish. Kur u pyet për mungesën e programuesve dhe specialistëve të IT-së, ai tha se kjo lidhet kryesisht me kualifikimet dhe rikualifikimet, por edhe me largimin e të rinjve nga vendi. Megjithatë, sipas tij, lëvizja është e dyanshme, pasi programues vijnë edhe nga jashtë për të punuar në vend.
“Në përgjithësi, mund të them se edhe vendet fqinje përballen me mungesë personeli, si pasojë e ndryshimeve teknologjike”, tha Dimitrovski.
Burimi: www.albeu.com









