Ndalimi i rrjeteve sociale për fëmijët nën 16 vjeç, nisma e paralajmëruar nga kryeministri Edi Rama, ka hapur debatin mbi sigurinë e të miturve në botën digjitale. Sociologia Era Musaj vlerëson se kjo masë do të ndihmonte në mbrojtjen e të miturve, ndërsa ekspertja e IT-së, Ahmedie Rexha, ngre pikëpyetje mbi zbatimin e saj dhe thekson rëndësinë e edukimit digjital dhe sigurisë online.
Rreziqet e rrjeteve sociale për adoleshentët
Rrjetet sociale janë kthyer në pjesë të përditshmërisë së fëmijëve dhe adoleshentëve, duke i ekspozuar gjithnjë e më shumë ndaj bullizmit, kërcënimeve dhe përmbajtjeve të papërshtatshme online.
Përballë këtij realiteti, kryeministri Edi Rama ka paralajmëruar një nismë për ndalimin e përdorimit të rrjeteve sociale për fëmijët nën 16 vjeç.
Sociologia Era Musaj e sheh këtë propozim si një mënyrë për të kufizuar ndikimin e realitetit virtual tek të miturit. Sipas saj, fëmijët kalojnë shumë kohë në rrjetet sociale, ku jo gjithmonë përballen me informacione të vërteta.
Pikëpyetjet mbi zbatimin dhe edukimin digjital
Nga ana tjetër, ekspertja e IT-së, Ahmedie Rexha, thekson se mbrojtja e fëmijëve kërkon jo vetëm kufizime, por edhe edukim për përdorimin e sigurt të teknologjisë.
Rexha ngre gjithashtu shqetësime për verifikimin e moshës përmes dokumenteve personale, duke paralajmëruar për rreziqet që mund të krijohen lidhur me sigurinë dhe mbrojtjen e të dhënave.
Ndërsa debati për kufizimin e rrjeteve sociale vijon, mbetet sfidë gjetja e një ekuilibri mes mbrojtjes së të miturve dhe edukimit të tyre për një përdorim të sigurt të botës digjitale.
Burimi: tirananews.al
