Kejd Kaningem nuk është një nga emrat më të mëdhenj në NBA. Kur thuhet Kejd Kaningem, kemi parasysh një basketbollist të talentuar dhe të shkathët, padyshim shumë i aftë, por jo një Doncic, Jokic, Shei apo Adetokumbo, për t’i dhënë disa shembuj.
Megjithatë, ky lojtar 25-vjeçar nga Teksasi pati mbrëmjen e tij në ligën më të fortë të basketbollit në botë.
Rekord historik në fitoren e Pistons
Në sfidën shumë të ashpër, që Detroit Pistons e fitoi me rezultatin 144-140 në fushën e Uashingtonit, ai vendosi një rekord historik.
Shënoi 52 pikë, shërbeu 11 asistime, kapi 5 topa në tabelë dhe shtoi nga një vjedhje topi dhe një bllokim gjuajtjeje.
Gjithë kjo, pa e humbur topin asnjëherë, diçka që ndodh rrallë në NBA.
Një rekord që askush tjetër nuk e ka arritur
Kaningem u bë lojtari i parë në historinë e basketbollit amerikan me të paktën 50 pikë, 10 asistime dhe asnjë humbje topi në një ndeshje.
Nuk e kanë arritur as Çembërlen, as Xhabar, Bërd, Mexhik Xhonson, Majkëll Xhordan apo Lebron Xhejms.
Ai arriti edhe rekordin personal të pikëve, pasi rekordi i mëparshëm ishte 46 pikë, të shënuara vitin e kaluar, sërish ndaj Uashingtonit.
Kaningem po luan një sezon shumë të mirë për Detroitin, duke shënuar mesatarisht 25 pikë për ndeshje, një nga më të dalluarit këtë vit.
Burimi: abcnews.al
