Ndeshja mes Shqipërisë dhe Finlandës do të sjellë një moment emocionues për tifozët kuqezi. Para fillimit të takimit në “Air Albania”, Federata Shqiptare e Futbollit do të organizojë një ceremoni të veçantë për Armando Sadikun, i cili do të marrë duartrokitjet e fundit si futbollist i Kombëtares shqiptare.
Sulmuesi shqiptar do të nderohet për kontributin e dhënë ndër vite me fanellën kuqezi, në një ceremoni ku pritet të jetë i pranishëm edhe presidenti i FSHF-së, Armand Duka.
Një emër i lidhur me historinë e Kombëtares
Sadiku mbetet një nga emrat më të veçantë të historisë së futbollit shqiptar, pasi emri i tij është i lidhur pazgjidhshmërisht me një prej momenteve më të mëdha të Kombëtares. Më 19 qershor 2016, në Kampionatin Europian të Francës, ai shënoi golin historik në fitoren 1-0 ndaj Rumanisë, duke i dhuruar Shqipërisë suksesin e parë në një fazë finale të Europianit.
Karriera me përfaqësuesen
Aventura e tij me përfaqësuesen nisi në vitin 2012 dhe përfundoi në vitin 2023. Gjatë kësaj periudhe, sulmuesi regjistroi 39 paraqitje dhe realizoi 12 gola. Në Euro 2016, Sadiku ishte titullar në të tria ndeshjet e fazës së grupeve, ndërsa goli ndaj Rumanisë e vendosi përgjithmonë në historinë e futbollit shqiptar.
Karriera e tij përfshiu eksperienca në disa kampionate europiane, por edhe në Bolivi e Indi. Megjithatë, kulmi mbetet padyshim aventura me Shqipërinë në Francë.
Burimi: kohajone.com
