Cilësia e ajrit në Nju Delhi, kryeqytetin e Indisë, ka pësuar një përkeqësim të theksuar pas festimeve të Festivalit Diwali, duke arritur nivele që klasifikohen si të rrezikshme për shëndetin.
Sipas televizionit indian NDTV, banorët e qytetit u zgjuan me një shtresë të dendur tymi që kishte mbuluar kryeqytetin, ndërsa dukshmëria në disa zona ishte reduktuar ndjeshëm.
Indeksi i ndotjes
Të dhënat e Bordit Qendror për Kontrollin e Ndotjes (CPCB), institucioni përgjegjës për monitorimin e cilësisë së ajrit, tregojnë se indeksi mesatar i ndotjes në Nju Delhi është rritur nga 350 një ditë më parë në 403. Kjo e zhvendos qytetin nga kategoria “shumë i dobët” në atë “i rrezikshëm”.
Festimet e Diwali
Rritja e ndotjes dyshohet se lidhet me përdorimin masiv të fishekzjarrëve gjatë Festivalit Diwali, i njohur ndryshe si Festivali i Dritave, që u festua në kryeqytetin indian më 8 nëntor.
Fishekzjarrët çlirojnë sasi të konsiderueshme grimcash ndotëse në atmosferë, duke e përkeqësuar edhe më tej cilësinë e ajrit në një qytet që përballet vazhdimisht me nivele të larta ndotjeje.
Burimi: euronews.al
