Në Minneapolis, qytetin amerikan ku operacionet e agjentëve të emigracionit (ICE) kanë qenë të shumta, zgjedhjet e mesmandatit u zhvilluan pa incidente, megjithëse banorët shprehnin shqetësim për ndërhyrje të mundshme federale. Votimi u zhvillua gjatë një dite me shi, dhe qendrat zgjedhore pritet të mbyllen në orën 03:00 të mëngjesit, sipas orës shqiptare.
Shqetësimet për agjentët federalë
Shqetësimet lidhen me paralajmërimet e presidentit Donald Trump për përdorimin e agjentëve federalë, pasi ai ka pretenduar se në listat zgjedhore gjenden edhe persona që nuk janë shtetas amerikanë.
Sipas të dhënave të cituara nga New York Times, në zgjedhjet e vitit 2024, Minesota publikoi 56% të rezultateve zyrtare deri në mesnatë sipas orës amerikane, ndërsa pjesa tjetër u bë e disponueshme deri në mesditën e ardhshme.
Gara për guvernatorin dhe Senatin
Vëmendja këtë herë është përqendruar te gara për guvernatorin, ku përballen republikania Lisa Demuth dhe demokratja Amy Klobuchar. Minesota është një nga 17 shtetet amerikane që nuk kanë pasur ende një grua në krye të qeverisjes shtetërore.
Një tjetër përballje e rëndësishme është ajo për Senatin, mes demokrates Peggy Flanagan, aktualisht zëvendësguvernatore, dhe Michele Tafoya. Sondazhet e cituara në raportim e nxjerrin Flanagan përpara rivales së saj.
Burimi: shqiptarja.com
