Ministria e Jashtme e Shqipërisë ka uruar Koalicionin Shqiptar për arritjen e dy mandateve në zgjedhjet e mbajtura dje në Serbi.
Ferit Hoxha dhe rëndësia e angazhimit qytetar
Ministri Ferit Hoxha i vlerëson zhvillimet e fundit në Serbi si tregues të peshës që ka pjesëmarrja qytetare. Sipas tij, fitorja e dy mandateve duhet të kontribuojë në përparimin e të drejtave të shqiptarëve të Luginës së Preshevës.
Ai thekson gjithashtu se një detyrim thelbësor mbetet normalizimi i marrëdhënieve me Kosovën. Pritshmëritë, sipas tij, janë për një angazhim konstruktiv në dialog dhe për hapa konkretë drejt marrëdhënieve të qëndrueshme.
Në përfundim, ai nënvizon se Shqipëria mbetet gjithmonë e gatshme për të bashkëpunuar me institucionet e reja që do të dalin nga ky proces.
Deklarata e plotë:
Shqipëria uron Koalicionin Shqiptar dhe shqiptarët e Luginës së Preshevës për rezultatin e arritur në zgjedhjet parlamentare në Serbi.
Zhvillimet në Serbi tregojnë rëndësinë e angazhimit qytetar dhe të votës së lirë si shprehje e vullnetit demokratik. Energjia qytetare që gjen përfaqësim përmes institucioneve përbën një mundësi për ndryshim, por edhe një përgjegjësi për ata që marrin besimin e qytetarëve.
Një urim i veçantë shkon për Koalicionin Shqiptar dhe shqiptarët e Luginës së Preshevës, të cilët kanë shënuar një rezultat të rëndësishëm në këto zgjedhje. Sipas projeksioneve paraprake, dy mandate parlamentare janë në perspektivë, ndërsa gara për një mandat të tretë mbetet e hapur. Ky përfaqësim duhet të shërbejë për avancimin e të drejtave të shqiptarëve, garantimin e trajtimit të barabartë dhe adresimin e shqetësimeve të tyre legjitime.
Në këtë kapitull të ri politik për Serbinë, normalizimi i marrëdhënieve me Republikën e Kosovës mbetet një përgjegjësi thelbësore. Shqipëria pret një angazhim konstruktiv në dialogun e ndërmjetësuar nga Bashkimi Europian, respektimin dhe zbatimin e marrëveshjeve të arritura, si dhe hapa konkretë drejt marrëdhënieve të qëndrueshme fqinjësore. Ndryshimi politik duhet të krijojë mundësi të reja edhe për paqen dhe bashkëpunimin në rajon.
Shqipëria mbetet e gatshme të bashkëpunojë me institucionet që do të dalin nga ky proces zgjedhor, mbi bazën e respektit të ndërsjellë, interesave të përbashkëta dhe angazhimit për një Ballkan Perëndimor më të qëndrueshëm, më të sigurt dhe të orientuar drejt së ardhmes europiane.
Burimi: shqiptarja.com
