Gazetari Sebastian Zonja, i cili ishte i ftuar në emisionin “Prime News24” në News24, ka ngritur dyshime lidhur me përgjegjësinë politike për dhunën që ndodhi gjatë protestave, si dhe për shoqërimin e të miturve nga ana e policisë.
Zonja u përqendrua te deklaratat e kryeministrit Edi Rama për masat që do të merren ndaj protestuesve, duke kritikuar me ashpërsi paralajmërimet për kufizimin e së ardhmes së të rinjve që marrin pjesë në tubime.
“Pyetja është se kush e jep urdhrin politik që të ketë dhunë në protestë dhe që këta 15-vjeçarë të shoqërohen?”, u shpreh gazetari, duke iu referuar edhe deklaratave të Ramës për përgatitjen e një liste me persona që mund të përballen me kufizime për pjesën tjetër të jetës.
Sipas Zonjës, kërcënimi i të miturve me pasoja afatgjata dhe dërgimi i policëve e civilëve në lagje e banesa janë çështje që kërkojnë përgjigje dhe përgjegjësi politike.
Çështja Balluku dhe projektet infrastrukturore
Gjatë intervistës, gazetari u ndal edhe te çështja e Belinda Ballukut dhe te projektet e rëndësishme infrastrukturore e energjetike që, sipas tij, Shqipëria nuk i ka realizuar.
Ai përmendi mungesën e projekteve të rëndësishme, si ndërtimi i një linje të tensionit të lartë me Bullgarinë, zhvillimi i eksporteve energjetike me Italinë, lidhja hekurudhore Tiranë-Durrës dhe infrastruktura që do të lidhte Tiranën me Prishtinën.
Sipas Zonjës, këto investime do të mund të krijonin më shumë mundësi ekonomike për qytetarët dhe bizneset shqiptare.
“Çështja është: kush e jep urdhrin politik që të ketë dhunë në protesta dhe që këta 15-vjeçarë të shoqërohen? Është po i njëjti person që thotë se do të bëjë një listë, në mënyrë që këta 15-vjeçarë të mos e shohin dritën e diellit për gjithë jetën e tyre, të mos hipin as në avion dhe as në autobus. Pra, t’ia nxish jetën një 15-vjeçari për 50 vitet e ardhshme, sepse ti do një listë tënden dhe të çosh policë e civilë në çdo lagje e shtëpi, kjo është një lloj urdhri politik.
Për çështjen Balluku, do të vija në pah faktin se ne duhet të ndërtojmë një linjë të tensionit të lartë me Bullgarinë, por nuk e bëjmë. Ne duhet të ndërtojmë linja eksporti të energjisë me Italinë, por nuk i kemi bërë. Këto janë projekte që do të ishin në xhepin e qytetarit, në mënyrë që ai të kishte më shumë para nesër.
Ne duhet të ndërtojmë një tren që shkon nga Tirana në Durrës, por nuk e kemi. Ne duhet të ndërtojmë një infrastrukturë që lidh Tiranën me Prishtinën, por nuk e kemi. Dhe të gjitha këto janë pikëpyetje që çdo qytetar duhet t’i ngrejë: Pse sot nuk kam më shumë para?
Pra, këto qindra miliona euro që do të ishin në xhepat e biznesmenëve apo qytetarëve shqiptarë nuk janë. Atëherë, ku shkojnë këto para?
SPAK-u ka detyrën e vet. Ka pesë akuza dhe akuza e pestë është më e rënda. Ato janë ndër akuzat më të rënda për një zyrtar të lartë, përpara se të flasim për vrasjen”, tha ai.
Burimi: www.balkanweb.com
