Shefja diplomatike e BE-së, Kaja Kallas, ka një tjetër kundërshtar që dëshiron largimin e saj: Marine Le Pen.
Udhëheqësja franceze e ekstremit të djathtë synon të çmontojë, ose të paktën ta zvogëlojë ndjeshëm, krahun diplomatik të BE-së nëse fiton zgjedhjet presidenciale të vitit 2027. Kështu theksojnë burime nga Fronti Kombëtar për Politico.
“Realiteti është se dobia e Kallas është shumë e kufizuar dhe ajo dyfishon diplomacinë e shteteve anëtare”, tha Charles-Henri Gallois, këshilltar i presidentit të Frontit Kombëtar, Jordan Bardella. “Askush nuk e njeh legjitimitetin e saj, veçanërisht as Shtetet e Bashkuara, as Kina.”
Komentet zbulojnë tensione në rritje mbi pushtetin e BE-së, ndërsa partitë nacionaliste nga Franca deri në Gjermani dhe Poloni kërkojnë ta rimarrin pushtetin nga Brukseli, me politikën e jashtme ndër objektivat e tyre kryesore. Ato po ushtrojnë gjithashtu presion shtesë mbi Kallas dhe Shërbimin Evropian të Veprimit të Jashtëm (SEVJ), i cili është përfshirë në një konflikt të zgjatur për territorin e politikës së jashtme me Komisionin Evropian të kryesuar nga Ursula von der Leyen.
Qëndrimi brenda Frontit Kombëtar është se shërbimi diplomatik i BE-së nuk është vetëm një shpenzim i kotë i parave të taksapaguesve, por gjithashtu i pengon kombet evropiane të tregojnë forcën e tyre në skenën botërore.
Ukraina dhe ndarja e thellë
Një shembull është Ukraina, ku Kallas dhe Le Pen janë thellësisht të ndarë, edhe pse nuk janë përplasur publikisht. Ish-kryeministrja estoneze është një nga kritikët më të ashpër të presidentit rus Vladimir Putin dhe një mbështetëse e vendosur e Volodymyr Zelenskyy, ndërsa Le Pen po nxit një konferencë ndërkombëtare paqeje për zgjidhjen e konfliktit dhe thotë se Evropa nuk ka më para për t’i dhënë Kievit.
Le Pen i ka drejtuar sulmet më të ashpra kundër von der Leyen, e cila prej kohësh akuzohet nga e djathta ekstreme për tejkalim të kompetencave. Por janë Kallas dhe SEVJ-ja ata që rrezikojnë të bëhen dëme anësore nën një presidencë të ekstremit të djathtë në Francë.
Le Pen është kandidatja kryesore përpara zgjedhjeve presidenciale të vitit të ardhshëm. Gjatë një vizite të fundit në Bruksel, ajo u zotua se do ta zvogëlonte Bashkimin Evropian nëse arrin në pushtet.
Burimi: insajderi.org
