Këshilli i Lartë Gjyqësor i kërkon Kuvendit një shtesë fondi prej 3.9 miliardë lekësh mbi shumën e parashikuar në projektbuxhetin e vitit 2027. Kërkesa mbështetet në nevojën për shtimin e personelit, mbulimin e shpenzimeve operative dhe investimet në infrastrukturën gjyqësore.
Kërkesat e KLGJ-së për godina dhe personel
Gjatë dëgjesës për buxhetin e ri në Komisionin për Nismat Qytetare, Bashkëpunimin dhe Mbikëqyrjen Institucionale të martën, kreu i KLGJ-së, Ilir Rusi, paraqiti kërkesat shtesë dhe ripërsëriti shqetësimet e viteve të mëparshme për investime në godina të reja të dedikuara për gjykatat.
“Pjesën më të madhe të kërkesave tona e zë infrastruktura e godinave,” tha ai, duke shtuar se “që prej vitit 2017 nuk kemi një godinë që të ketë përfunduar me funksion të dedikuar si gjykatë”. Sipas tij, nga 20 gjykatat e sistemit, vetëm 5 ushtrojnë aktivitetin në godina të dedikuara, ndërsa të gjitha të tjerat janë përshtatura për këtë qëllim.
KLGJ kërkon gjithashtu fonde për rritjen e personelit të gjykatave dhe për pagesën e orëve të gatishmërisë së gjyqtarëve, si dhe të orëve jashtë orarit të stafit administrativ. Rusi argumentoi se buxheti i institucionit është trefishuar që nga viti 2019, por se për këtë vit ai është 1.1 përqind më i ulët se i vitit të kaluar.
Shqetësimet e deputetëve
Kuvendi përballet pothuajse çdo vit me kërkesa për investime dhe fonde shtesë për personel në sistemin gjyqësor. Megjithatë, edhe kur fondet janë akorduar, investimet nuk janë realizuar brenda vitit buxhetor, për arsye të ndryshme. KLGJ e justifikoi këtë me mungesën e trojeve nga pushteti vendor për godinat e reja, por deputetët e pritën këtë arsyetim me rezerva.
Kryetari i Komisionit, Fatmir Xhafaj, tha se Këshilli kishte “nevojë për reflektim” mbi mosrealizimin e investimeve të parashikuara. “Këshilli mund të ushtrojë më shumë përgjegjësi për eficencën e stafit administrativ,” i sugjeroi ai Rusit, duke shtuar se “të kërkosh lekë dhe të mos realizosh buxhete vit pas viti kjo nuk është normale”.
Relatorja e komisionit për projektbuxhetin, deputetja Evis Kushi, vlerësoi se disa nga kërkesat shtesë nuk janë argumentuar me të dhëna të mjaftueshme.
Detajet e buxhetit
Sipas raportit të Kushit, projektbuxheti i përgatitur nga Ministria e Financave parashikon 6.77 miliardë lekë për KLGJ-në dhe sistemin gjyqësor, shifër që është 74.22 milionë lekë më pak se buxheti i ndryshuar i vitit 2026. Kërkesat shtesë arrijnë në 3.99 miliardë lekë, ose 37 përqind, dhe lidhen me tre drejtime: personelin, shpenzimet operative dhe investimet. “Më e rëndësishmja është kërkesa për personel shtesë,” tha Kushi.
Për investimet, KLGJ kërkon 2.97 miliardë lekë më shumë se fondi prej 957.5 milionë lekësh i parashikuar në projektbuxhet. Prioritetet e institucionit janë rikonstruksioni dhe zgjerimi i Gjykatës Administrative të Shkallës së Parë Tiranë, pajisjet e sigurisë dhe pajisjet kompjuterike. Për ndërtime të reja kërkohen edhe 970 milionë lekë, të cilat, sipas KLGJ-së, varen nga sigurimi i truallit, përgatitja e projekteve dhe koordinimi me planifikimin e qeverisë.
Kërkesat e relatores
Kushi i kërkoi KLGJ-së të paraqesë metodologjinë dhe të dhënat mbështetëse për numrin e gjyqtarëve, analizën e ngarkesës dhe stokun e çështjeve për çdo gjykatë. Ajo kërkoi gjithashtu një listë me prioritetet e investimeve dhe informacion mbi gatishmërinë e projekteve të ndërtimit.
Relatorja theksoi se zgjerimi i kapaciteteve njerëzore duhet të mbështetet në analiza konkrete të ngarkesës së gjykatave, pasi 199 pozicionet e reja që kërkohen nuk janë argumentuar sipas gjykatave dhe profileve të punës.
Burimi: www.reporter.al
