Kalo te përmbajtja

Lajme të shpejta, të verifikuara dhe të paanshme

Lajm i fundit
Politikë

Buxheti 2027 në Kuvend: çfarë ndryshon në paketën fiskale?

Buxheti 2027 në Kuvend: çfarë ndryshon në paketën fiskale?
Foto: lajmifundit.al

Sot në rend dite do të jenë diskutimet për Paketën Fiskale dhe Buxhetin e vitit 2027. Të dyja nismat kanë kaluar më herët në komisionet parlamentare.

Partia Demokratike do të jetë e përfaqësuar me një numër më të vogël deputetësh, për shkak të përjashtimit të 12 ligjvënësve. Mes tyre janë edhe kreu i grupit parlamentar, Gazment Bardhi, dhe sekretari i Përgjithshëm, Flamur Noka.

Një ditë para seancës, kreu i PD-së, Sali Berisha, bëri të qartë qëndrimin e opozitës, duke deklaruar se demokratët do të votojnë kundër projektbuxhetit. Ai e cilësoi hartimin e tij si një proces të zhvilluar në mungesë transparence dhe pa konsultime me qytetarët apo përfaqësuesit e biznesit.

Sipas Berishës, projektbuxheti favorizon një grup të kufizuar përfituesish, ndërsa barra financiare bie mbi qytetarët dhe sipërmarrjet shqiptare.

Pas votimit në parim në Kuvend, projektbuxheti do t’u rikthehet komisioneve parlamentare për shqyrtimin nen për nen, përpara se të kalojë sërish në seancë plenare për votimin përfundimtar.

Çfarë parashikon rendi i ditës?

Përveç projektbuxhetit të vitit 2027, deputetët do të shqyrtojnë edhe disa ndryshime në legjislacionin fiskal, që prekin tatimin mbi të ardhurat, Tatimin mbi Vlerën e Shtuar (TVSH), procedurat tatimore, taksat kombëtare dhe akcizat.

Në rendin e ditës janë përfshirë gjithashtu ndryshimet në ligjin për strehimin social, një vendim për Komisionin e Posaçëm Parlamentar për Reformën Administrativo-Territoriale, si dhe diskutimet për çështje jashtë rendit të ditës.

Seanca do të nisë me miratimin e procesverbalit të mbledhjes së 29 tetorit 2026, për të vijuar më pas me njoftimet dhe shqyrtimin e projektligjeve të parashikuara.

Rendi i ditës së seancës plenare:

  • Miratimi i procesverbalit të seancës plenare të datës 29.10.2026.
  • Njoftime.
  • Projektligji “Për disa shtesa dhe ndryshime në ligjin nr. 29/2023, ‘Për tatimin mbi të ardhurat’, të ndryshuar”.
  • Projektligji “Për disa ndryshime dhe shtesa në ligjin nr. 92/2014, ‘Për tatimin mbi vlerën e shtuar në Republikën e Shqipërisë’, të ndryshuar”.
  • Projektligji “Për disa shtesa dhe ndryshime në ligjin nr. 9920, datë 19.5.2008, ‘Për procedurat tatimore në Republikën e Shqipërisë’, të ndryshuar”.
  • Projektligji “Për disa ndryshime në ligjin nr. 9975, datë 28.7.2008, ‘Për taksat kombëtare’, të ndryshuar”.
  • Projektligji “Për disa ndryshime dhe shtesa në ligjin nr. 61/2012, ‘Për akcizat në Republikën e Shqipërisë’, të ndryshuar”.
  • Projektligji “Për buxhetin e vitit 2027”.
  • Projektligji “Për disa ndryshime dhe shtesa në ligjin nr. 22/2018, ‘Për strehimin social’, të ndryshuar”.
  • Projektvendimi “Për një ndryshim në vendimin nr. 169/2026 të Kuvendit ‘Për ngritjen e Komisionit të Posaçëm Parlamentar për fazën e dytë të Reformës Administrativo-Territoriale në Republikën e Shqipërisë’”.
  • Diskutime për çështje jashtë rendit të ditës.

Burimi: lajmifundit.al

Të fundit Të gjitha