Ushtruesja e detyrës së kryetares së Partisë Demokratike të Kosovës, Vlora Çitaku, priti sot në takim ambasadorin e Mbretërisë së Bashkuar në Kosovë, Jonathan Hargreaves. Ata diskutuan për zhvillimet e fundit politike në vend.
Çitaku e vlerësoi pozitivisht përfundimin e formimit të institucioneve. Ajo theksoi se tani nevojitet përqendrim te adresimi i sfidave të qytetarëve dhe te përparimi i prioriteteve shtetërore.
“Kosova përballet me sfida të rëndësishme që kërkojnë vëmendje të plotë institucionale, përgjegjësi dhe angazhim për të përmirësuar jetën e qytetarëve”, theksoi Çitaku.
Procesi gjyqësor në Hagë
Gjatë takimit u diskutua edhe procesi gjyqësor pranë Dhomave të Specializuara në Hagë. Çitaku nënvizoi rëndësinë e respektimit të standardeve më të larta të drejtësisë, të së drejtës për gjykim të drejtë dhe të vendimmarrjes së mbështetur në fakte e prova, të pavarur nga ndikimet politike.
Partneriteti dhe perspektiva euroatlantike
Në takim u riafirmua rëndësia e partneritetit të qëndrueshëm të Kosovës me aleatët e saj. U theksua gjithashtu përkushtimi ndaj perspektivës euroatlantike të vendit, me synim anëtarësimin në NATO dhe në Bashkimin Evropian.
Burimi: pressonline.al
