Ndërmarrja Publike “Termokos” ka bërë të ditur se furnizimi me ngrohje është rikthyer. Ky rikthim u bë i mundur pasi njësia B2 e TC Kosova B u vu përsëri në funksion dhe u krijuan kushtet për marrjen e sasive të avullit nga kjo njësi.
Rikthimi i furnizimit me ngrohje
“Që nga orët e para të mëngjesit të sotëm, ekipet e NP “Termokos”, të angazhuara me të gjitha kapacitetet operative dhe në bashkëpunim të ngushtë me KEK-un, kanë punuar për rikthimin gradualisht të furnizimit me ngrohje. Në këtë moment, furnizimi me ngrohje është stabilizuar për shumicën e konsumatorëve”, citohet në njoftimin e Termokosit.
Në njoftim shtohet se ekipet vazhdojnë punën në terren për të garantuar furnizimin edhe në pikat më të largëta të rrjetit, sepse qarkullimi i ngrohjes në ato zona kërkon më shumë kohë.
Ndalja e mëparshme e furnizimit
Tre ditë më parë, Termokosi e kishte ndërprerë furnizimin me ngrohje për shkak të ndaljes së kontrolluar të njësisë B2 të Termocentalit Kosova B, pasi kjo solli pamundësinë e furnizimit me avull për prodhimin e energjisë ngrohëse.
Gjatë kësaj periudhe, furnizim me ngrohje kishte vetëm për klinikat e Qendrës Klinike Universitare të Kosovës (QKUK).
Burimi: insajderi.org
