Një shtetas shqiptar 32-vjeçar është arrestuar në Itali, pasi dyshohet se ishte i përfshirë në dy vjedhje në banesa në Bergamo.
Ndjekja dhe arrestimi
Policia kishte identifikuar një automjet të dyshimtë në Albano Sant’Alessandro dhe e kishte ndjekur deri në Torre de’ Roveri. Pas një ndalese pranë fushës sportive, drejtuesi i automjetit kishte marrë në makinë dy persona që vinin nga zonat bujqësore përreth.
Lëvizjet e tyre ngritën dyshime te karabinierët, të cilët kërkuan përforcime nga patrulla e Radiomobile. Sapo panë efektivët, tre personat braktisën automjetin dhe u larguan me vrap drejt fushave.
Dy prej tyre arritën të arratisen, ndërsa 32-vjeçari shqiptar u kap pas një përleshjeje me efektivët. Sipas karabinierëve, ai mbante ende veshur doreza të zeza pune dhe gjatë rezistencës shkaktoi rrëzimin dhe plagosjen e një prej efektivëve.
Sendet e sekuestruara
Mediat italiane shkruajnë se, gjatë kontrollit, policia gjeti dhe sekuestroi mbi 1 mijë euro para të gatshme, disa bizhuteri ari dhe sende të tjera me vlerë.
Gjithashtu, u sekuestruan disa mjete që dyshohet se mund të përdoreshin për vjedhje në banesa, mes tyre kaçavida, pincë prerëse, një majë trapan të modifikuar, dy elektrikë dore, një fleksibël dhe një radio marrëse-dhënëse.
Masa e marrë ndaj të arrestuarit
32-vjeçari u arrestua dhe u dërgua në burgun e Bergamos. Pas seancës së vleftësimit të arrestit, gjyqtari i hetimeve paraprake vendosi që ai të qëndrojë në arrest shtëpie, me byzylyk elektronik.
Ndërkohë, hetimet vijojnë për zbardhjen e plotë të ngjarjes dhe identifikimin e vendndodhjes së dy bashkëpunëtorëve të tjerë, të cilët janë ende në kërkim.
Burimi: lajmifundit.al
