Policia e Shkodrës ka përfunduar operacionin e koduar “Polinomi 2”, në vijim të aksionit “Polinomi”, i zhvilluar disa ditë më parë, duke goditur një tjetër aktivitet të dyshuar kriminal në fushën e narkotikëve dhe armëmbajtjes pa leje.
Arrestimet dhe hetimi
Gjatë operacionit, pas katër muajsh hetimesh me metoda proaktive, janë arrestuar dy vëllezër, Gjovalin Sheja, 49 vjeç, dhe Kujtim Sheja, 57 vjeç. Ndërkohë, djali 24-vjeçar i këtij të fundit, Kristjan Sheja, është shpallur në kërkim.
Sekuestrimet në banesa
Kontrollet e kryera në banesat e tyre, në fshatrat Abat dhe Grudë e Re, kanë rezultuar me sekuestrimin e rreth 77 kilogramëve lëndë të dyshuar narkotike Cannabis Sativa. Në banesën e 49-vjeçarit u gjetën 10 kilogramë kanabis, ndërsa në atë të 57-vjeçarit u sekuestruan rreth 66.8 kilogramë të tjera, të ndara në thasë.
Përveç lëndës narkotike, në banesën e 57-vjeçarit u gjetën edhe një pistoletë me krehër me fishekë, një pushkë pneumatike, municion luftarak për armë zjarri dhe armë gjahu, aksesorë armësh, një shkop metalik, dy radio marrëse-dhënëse, një peshore elektronike dhe tre pajisje optike, mes tyre dy kamera dhe një monokular.
Hetimet vijojnë
Sipas Policisë, hetimet vazhdojnë për kapjen e 24-vjeçarit të shpallur në kërkim, si dhe për dokumentimin e plotë të veprimtarive të dyshuara kriminale dhe përfshirjes së personave të tjerë. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.
Burimi: euronews.al
