Miliona njerëz në mbarë botën mbetën pa akses në email, takime online dhe shërbime të tjera të Microsoft pas një defekti që goditi bizneset, shkollat dhe institucionet shtetërore. Në disa kompani punonjësit u larguan më herët nga puna, ndërsa në Australi pati shkolla që nuk zhvilluan dot mësimin online dhe biznese që nuk mund të printonin faturat.
Si u përhap defekti
Problemet filluan të enjten rreth mesditës në bregun lindor të SHBA-së dhe u përhapën shumë shpejt në vende të tjera. Sipas raportimeve, deri në 430 milionë përdorues mund të jenë prekur në një moment nga ndërprerja e shërbimeve.
Outlook dhe Teams, dy nga platformat më të përdorura për komunikimin në punë, ishin ndër shërbimet e prekura. Deri të enjten në orën 22:30, sipas kohës së bregut lindor amerikan, problemet vazhdonin për miliona përdorues.
Efektet në shkolla, gjykata dhe biznese
Në Australi, situata krijoi vështirësi edhe jashtë zyrave. Transmetimet e drejtpërdrejta nga gjykatat u ndërprenë, ndërsa disa shkolla i kërkuan prindërve të njoftonin me telefon për mungesat e fëmijëve, pasi emaili nuk funksiononte.
Sipas televizionit publik australian ABC, disa persona humbën intervista pune sepse nuk u lidhën dot në takimet virtuale. U raportuan gjithashtu probleme me furnizimet në disa qendra shpërndarjeje që furnizojnë supermarketet.
Në SHBA, disa punonjës bënë shaka se ndërprerja e emailit u dha mundësinë ta nisnin fundjavën më herët. Të tjerë vazhduan komunikimin përmes telefonit, platformës Slack ose takimeve ballë për ballë. Bizneset e vogla kërkuan alternativa për të komunikuar me klientët, ndërsa disa autoritete vendore u kërkuan qytetarëve të telefononin në vend që të dërgonin email.
Kostoja ekonomike
Dëmi ekonomik mund të jetë i konsiderueshëm. Sipas një vlerësimi fillestar të Anderson Economic Group, ndërprerja mund të kushtojë rreth 7 miliardë dollarë në produktivitet të humbur.
Presidenti i kompanisë, Patrick Anderson, vlerësoi se rreth 26 milionë përdorues të enjten dhe 51 milionë të premten mund të kenë pasur ndërprerje të punës që u kanë shkaktuar humbje ekonomike. Sipas tij, kostoja mund të rritet përtej vlerësimit fillestar.
Shpjegimi i Microsoft
Microsoft sqaroi se problemi nuk lidhej me ndonjë sulm kibernetik, por me një defekt teknik gjatë një përmirësimi të mëparshëm të kapacitetit të rrjetit, i cili u shfaq pas një ndryshimi të fundit në rrjet.
“Kërkojmë ndjesë të thellë për ndërprerjen që ky incident u ka shkaktuar klientëve dhe partnerëve tanë”, njoftoi kompania të premten.
Microsoft bëri të ditur se problemi që shkaktoi ndërprerjen është zgjidhur dhe se shërbimet po rikthehen gradualisht. Sipas kompanisë, numri i emaileve që prisnin të dërgoheshin është ulur ndjeshëm dhe po i afrohet niveleve normale.
Megjithatë, disa përdorues të Outlook vazhdojnë të kenë probleme, ndërsa kompania thotë se po sheh përparim në rikthimin e shërbimeve.
Burimi: shqiptarja.com
