Drejtori i Spitalit të Fierit, Arben Voja, u arrestua sot me urdhër të Prokurorisë së Fierit për „shpërdorim detyre” në kohën kur drejtonte Agjencinë Shtetërore të Kadastrës në këtë qytet. Arrestimi u bë pas një hetimi për tjetërsimin e një sipërfaqeje prej 44 mijë metrash katrorë tokë shtetërore në zonën e Povelçës.
Karriera e tij në administratën publike
Arben Voja është një zyrtar publik dhe drejtues institucional në qytetin e Fierit, i njohur për disa funksione të ndryshme në administratën publike. Ai ka mbajtur këto detyra të rëndësishme:
- Kryetar i ish-Komunës Seman.
- Drejtues i Drejtorisë Rajonale të Mbrojtjes së Territorit (DRMT) Fier.
- Drejtues i Agjencisë Rajonale të Mjedisit në Fier.
- Drejtor i Zyrës Vendore të Kadastrës (ASHK) në Fier, emëruar në maj 2022.
- Drejtues i Spitalit Rajonal të Fierit, detyrë në të cilën u emërua më 30 janar 2025 pas dorëheqjes së ish-drejtorit Roel Zoga.
Hetimet e mëparshme
Voja është përballur më parë me hetime nga Prokuroria e Fierit, kur ishte në krye të Agjencisë së Mjedisit dhe Kadastrës. Në dhjetor të vitit 2025, organi i akuzës njoftoi për përfundimin e hetimeve dhe dërgimin për gjykim të tij dhe të 6 punonjësve të tjerë, për shpërdorim detyre në bashkëpunim. Çështja lidhej me shkelje në procedurat e dhënies së lejeve mjedisore.
Gjithashtu, në maj të vitit 2023, kur ishte në krye të Kadastrës së Fierit, Voja u denoncua në SPAK nga Agjencia Shtetërore e Kadastrës. Në denoncim theksohej se drejtori i Fierit dhe specialistja Shpresa Gjikondaj akuzoheshin për shpërdorim detyre dhe falsifikim dokumentesh, me një dëm ekonomik për shtetin shqiptar prej 9.5 milionë lekësh.
Lidhur me këtë denoncim, reagoi atëherë edhe drejtoresha e Agjencisë Shtetërore të Kadastrës, Dallëndyshe Bici, e cila theksoi se kushdo që përpiqej të përfitonte në mënyrë të paligjshme nga detyra në Kadastër do të hetohej nga prokuroria.
Burimi: shqiptarja.com
