Sulmet kibernetike që së fundmi kanë goditur sistemet e frigoriferëve dhe ngrirësve në supermarkete mund të përhapen edhe te pajisjet elektroshtëpiake dhe routerët e internetit në banesa. Këtë paralajmërim e bëri drejtori ekzekutiv i Agjencisë së Bashkimit Evropian për Sigurinë Kibernetike (ENISA), Juhan Lepassaar.
Në një intervistë për agjencinë franceze të lajmeve AFP, Lepassaar theksoi se kërcënimet në hapësirën digjitale po rriten, ndaj Evropa duhet të shtojë investimet për mbrojtjen e sistemeve dhe infrastrukturës teknologjike.
Dyshimet për Iranin
Duke iu referuar sulmit ndaj pajisjeve ngrirëse, për të cilin Franca ka ngritur dyshime se pas tij qëndron Irani, kreu i ENISA-s nuk pranoi të komentojë këto pretendime.
Megjithatë, ai nënvizoi se është e njohur që aktorë kibernetikë të lidhur me shtete si Kina, Irani, Koreja e Veriut dhe Rusia kanë përfshirë Evropën në objektivat e tyre.
Rreziku për qytetarët
Sipas Lepassaar, rreziku nuk kufizohet më vetëm te institucionet apo infrastruktura kritike, por mund të prekë gjithnjë e më shumë edhe pajisjet e përditshme që qytetarët përdorin në shtëpitë e tyre.
Ai bëri thirrje për më shumë angazhim dhe investime në sigurinë kibernetike, duke theksuar rëndësinë e përgatitjes së Evropës përballë kërcënimeve të reja digjitale.
Burimi: lajmifundit.al
