UEFA ka fituar një vendim të parë në favor të saj në çështjen ligjore kundër FIFA-s, lidhur me planin e presidentit Gianni Infantino për të shitur një pjesë të aksioneve të Kupës së Botës te investitorë privatë. Më 12 nëntor, një gjykatë në Nju Jork refuzoi kërkesën e FIFA-s për të penguar mbledhjen e provave.
Dokumentet që UEFA synon të marrë
Falë këtij vendimi, UEFA mund të sigurojë dokumente, vlerësime financiare dhe lista të investitorëve të mundshëm. Këto materiale pritet të sqarojnë prapaskenat e FIFA Forward Enterprise (FFE), degës përmes së cilës Infantino synonte të realizonte shitjen e një aksioni privat në Kupën e Botës.
Në fund të gushtit, UEFA kishte paraqitur katër padi në gjykatat amerikane për të marrë dokumente që do t’i shërbenin çështjes së saj ligjore në Zvicër. Në Nju Jork, gjykata nuk e pranoi kërkesën e FIFA-s për të rrëzuar urdhrin për dorëzimin e dokumenteve që lidhen me Thrive dhe JP Morgan.
Argumentet e FIFA-s dhe refuzimi i gjyqtares
FIFA pretendoi se, përmes mbledhjes së provave, UEFA po përpiqej të ndikonte në zgjedhjet presidenciale të organizatës botërore të futbollit. Avokatët e FIFA-s e cilësuan veprimin si një fushatë dezinformimi të lidhur me garën presidenciale dhe thanë se sjellja e UEFA-s ishte keqdashëse dhe synonte ngacmimin.
Gjyqtarja nuk i pranoi këto pretendime. Sipas saj, FIFA nuk kishte interes të drejtpërdrejtë ligjor për t’u përfshirë në procedura, ndërsa kërkesat e tjera do ta zvarrisnin procesin dhe do ta dëmtonin padrejtësisht UEFA-n.
Pyetjet e UEFA-s dhe hapat e mëtejshëm
Përplasja mes dy organizatave shtrihet edhe jashtë sallave të gjyqit. Në tetor, UEFA i drejtoi Sekretarit të Përgjithshëm të FIFA-s, Mattias Grafström, 42 pyetje për veprimtarinë e organizatës. Mes çështjeve të ngritura ishin roli i Infantinos në projektin FFE, leja që Folarin Balogun të luante për ekipin kombëtar të SHBA-së dhe zgjatja në 27 minuta e pjesës së parë të finales së Kupës së Botës mes Spanjës dhe Argjentinës, pa iu paraqitur më parë një kërkesë IFAB-it.
Vendimi në Nju Jork përbën vetëm hapin e parë të kësaj çështjeje. Procedurat e tjera në SHBA mund t’i japin UEFA-s më shumë të dhëna për projektin që synonte të ndryshonte mënyrën e financimit të Kupës së Botës.
Burimi: www.albeu.com
