TIRANË, 10 nëntor /ATSH/ Kombëtarja shqiptare zhvilloi pasditen e sotme seancën e radhës stërvitore në “Shtëpinë e Futbollit”, si pjesë e përgatitjeve për ndeshjet ndaj Finlandës dhe Bjellorusisë.
Seanca stërvitore dhe gjendja e lojtarëve
Departamenti i Komunikimit në FSHF njoftoi se në seancën e sotme të gjithë lojtarët ishin në dispozicion të trajnerit Rolando Maran, të cilët zhvilluan stërvitjen me ngarkesë të plotë.
Ndërkohë, Arbër Hoxha dhe Cristian Shpendi zhvilluan stërvitje të diferencuar në fushë, me qëllim rikuperimin nga dëmtimet e pësuara pas goditjeve të marra në ndeshjet e fundit me klubet e tyre. Të dy futbollistët pritet t’i bashkohen grupit nesër, për seancën zyrtare stërvitore në prag të ndeshjes me Finlandën.
Puna në palestër dhe në fushë
Seanca e sotme nisi me punën në palestër. Më pas, trajneri Maran, së bashku me ekipin, punoi në disa situata të ndryshme loje dhe aspekte taktike.
Programi për ditën e nesërme
Nesër, kombëtarja shqiptare do të zhvillojë seancën zyrtare stërvitore në orën 11:00. Të paktën 15 minutat e para do të jenë të hapura për mediat. Po nesër, në orën 16:00 në stadium, do të zhvillohet konferenca zyrtare me trajnerin Maran dhe një lojtar.
Ekipi i Finlandës do të zhvillojë konferencën zyrtare për media në orën 11:30, ndërsa seanca e tyre stërvitore është planifikuar për orën 12:30.
Ndeshja Shqipëri–Finlandë
Ndeshja Shqipëri–Finlandë, e vlefshme për UEFA Nations League, do të luhet të enjten, në stadiumin “Air Albania”, në orën 20:45. Stadiumi do të jetë i mbushur plotësisht, pasi të gjitha biletat për këtë sfidë janë shitur.
/gj.m/r.e/
Burimi: ata.gov.al
