Sabiani dhe vajza e tij, Keisi Medini, kanë qenë të ftuar në emisionin “Live me Luizin”, ku kanë folur për marrëdhënien e tyre si babë e bijë dhe kanë ndarë disa momente me humor.
Dhurata e Keisit dhe shaka e shtatzënisë
Gjatë emisionit, Keisi kishte përgatitur një surprizë për të atin, duke i dhënë një kuti brenda së cilës ndodheshin dy këpucë të vogla për bebe.
Përmes kësaj dhurate, ajo la të kuptohej se ishte shtatzënë, duke pritur reagimin e Sabianit.
Këngëtari u vu për një moment në siklet dhe piu pak ujë, por duket se e kuptoi shpejt se vajza po bënte shaka me të.
“Janë për maçokun e Keisit, i ka për Vitin e Ri”, u shpreh ai duke qeshur, ndërsa përpiqej ta kthente situatën në humor.
Megjithatë, Keisi vazhdoi lojën dhe e pyeti të atin se përse nuk po e besonte lajmin.
“Pse nuk e beson ti?”, i tha ajo.
“Mos u lodh kot, mos e thuaj fare”, iu përgjigj Sabiani, duke treguar se nuk kishte ndërmend të binte pre e shakasë.
Reagimi i Sabianit
Gjatë bisedës, këngëtari shtoi se edhe nëse lajmi do të ishte i vërtetë, për të nuk do të përbënte problem.
“O gjigand, ma ndien shpirti mua”, u shpreh më pas ai me humor, duke këmbëngulur se e kishte kuptuar që në fillim që bëhej fjalë për një shaka.
Ky moment solli të qeshura në studio, ndërsa Keisi nuk arriti ta bindte të atin se dhurata ishte një mënyrë për t’i njoftuar ardhjen e një nipi apo mbese.
Marrëdhënia e tyre në sy të publikut
Kujtojmë se Sabiani dhe Keisi Medini kanë qenë shpesh në vëmendjen e publikut për raportin e tyre të afërt, veçanërisht gjatë pjesëmarrjes së Keisit në “Big Brother VIP Albania 2”, kur këngëtari u përfshi në diskutimet rreth marrëdhënies së saj me Kristin.
Këtë herë, dyshja kanë zgjedhur të ndajnë një moment me humor në emisionin e Luiz Ejllit, ndërsa lajmi i shtatzënisë ishte vetëm një shaka e përgatitur nga Keisi.
Burimi: www.kosovarja-ks.com
