Fëmijëria në një familje me vështirësi ekonomike mund të ndikojë te mënyra se si një person i menaxhon paratë edhe shumë vite më vonë. Edhe kur gjendja financiare përmirësohet, disa zakone të krijuara që në fëmijëri vazhdojnë të ndikojnë në vendimet e përditshme.
Sipas YourTango, njerëzit që janë rritur me pak mundësi ekonomike shpesh zhvillojnë këto tetë zakone:
Zakonet e shpenzimeve dhe kursimit
1. Zgjedhin gjithmonë ushqimin më të lirë në restorant
Edhe kur kanë mundësi të shpenzojnë më shumë, priren të porosisin pjatën më të lirë në menu. Për ta, kursimi është bërë një zakon i natyrshëm, pasi që në fëmijëri kanë mësuar se çdo shpenzim duhet menduar mirë.
2. Gatuajnë pothuajse çdo vakt në shtëpi
Shprehja e prindërve “Kemi ushqim në shtëpi” u ka mbetur në mendje. Ata preferojnë të përgatisin vetë ushqimin, në vend që të shpenzojnë për restorante apo ushqime të gatshme. Kjo jo vetëm që kursen para, por shpesh ndihmon edhe në ushqyerjen më të shëndetshme.
3. Preferojnë të blejnë produkte të përdorura
Rrobat, mobiliet dhe sendet e tjera të përdorura janë një mënyrë për të kursyer. Edhe nëse në fëmijëri kjo mund t’u ketë shkaktuar siklet, në moshë madhore shumë prej tyre e shohin blerjen e produkteve të dorës së dytë si zgjedhje praktike dhe ekonomike.
4. I ruajnë gjërat e mira për raste të veçanta
Një parfum i shtrenjtë, një veshje e bukur apo një produkt i preferuar mund të qëndrojë për muaj të tërë i papërdorur. Arsyeja është frika se, nëse e konsumojnë, mund të mos kenë mundësi ta blejnë përsëri. Kështu, ata presin momentin e duhur për të shijuar diçka që në fakt mund t’ua bëjë ditën më të bukur.
5. Mbajnë një buxhet të rreptë dhe përpiqen të mos e tejkalojnë
Planifikimi i shpenzimeve bëhet pjesë e përditshmërisë. Ata duan të kenë gjithmonë para mënjanë, nga frika se mund të përballen sërish me vështirësi ekonomike. Edhe pse ky zakon ndihmon në kursim, ndonjëherë i pengon të shpenzojnë për kënaqësitë e vogla të jetës.
6. Blejnë më shumë seç u nevojitet kur produktet janë në ulje
Kur shohin oferta, priren të blejnë sasi të mëdha, edhe nëse nuk kanë nevojë të menjëhershme për gjithçka. Kjo u jep siguri se do t’i kenë produktet e nevojshme edhe nëse në të ardhmen u mungojnë paratë. Për ta, një ofertë është një mundësi që nuk duhet humbur.
7. Përfitojnë nga çdo gjë që ofrohet falas
Edhe kur kanë një gjendje të mirë ekonomike, vazhdojnë të kërkojnë produkte dhe shërbime falas. Mund të marrin produkte higjienike në hotele apo të përfitojnë nga çdo mundësi për të mos shpenzuar. Kjo lidhet me frikën se një ditë mund të mos kenë më mundësi të përballojnë nevojat e tyre.
8. Preferojnë të qëndrojnë në shtëpi në vend që të dalin
Daljet me miqtë, kinemaja apo aktivitetet argëtuese mund t’u duken shpenzime të panevojshme. Ata janë mësuar që në fëmijëri se argëtimi jashtë shtëpisë kushton dhe se qëndrimi në shtëpi është gjithmonë alternativa më ekonomike. Në disa raste, kjo frikë nga shpenzimi mund t’i bëjë të shmangin edhe aktivitetet që dëshirojnë vërtet.
Burimi: living.al
