Gazetarja e njohur Ilva Tare është vlerësuar me një çmim në kuadër të aktivitetit “Nëntori Shqiptar”, i cili mbahet çdo vit në New York dhe i kushtohet kulturës, artit, traditës dhe bashkimit të komunitetit shqiptar në Shtetet e Bashkuara.
Mirënjohja e gazetares
Pas këtij vlerësimi, Tare ka ndarë në rrjetet sociale një mesazh plot emocion dhe mirënjohje, duke falënderuar organizatorët dhe të gjithë shqiptarët që e kanë mbështetur ndër vite në rrugëtimin e saj profesional dhe personal.
Në veçanti, gazetarja ka shprehur mirënjohjen ndaj familjes së saj, duke e cilësuar atë si shtyllën dhe burimin më të madh të dashurisë në jetën e saj. Një vend të veçantë në dedikimin e saj zuri edhe nëna, për të cilën tregoi se Amerika kishte qenë gjithmonë një ëndërr e madhe.
“Jam thellësisht falënderuese ndaj familjes sime. Janë shtylla ime, foleja e dashurisë, por edhe shpërblimi e çmimi më i bukur që më ka dhënë jeta dhe Zoti!”, shkroi ajo.
Ilva Tare nuk la pa përmendur as komunitetin shqiptar, duke theksuar se dashuria dhe mbështetja e tyre janë pjesë e pandashme e identitetit të saj.
Çfarë është “Nëntori Shqiptar”
“Nëntori Shqiptar” është një aktivitet i përvitshëm në New York, i organizuar nga producenti Eduard Deda, që synon të promovojë vlerat shqiptare dhe të forcojë lidhjet mes shqiptarëve në diasporë.
Vlerësimi për Ilva Taren bëhet kështu një tjetër moment i veçantë në karrierën e saj, të cilin gazetarja zgjodhi ta ndajë me një mesazh të ndjerë mirënjohjeje.
Burimi: bordo.al
