Individët që banojnë afër zonave të gjelbërta mund të kenë një mundësi më të vogël për t’u prekur nga demenca, sipas një hulumtimi të fundit.
Të jetuarit në një ambient me më shumë bimësi pranë vendbanimit lidhet me një ulje prej 20% të rrezikut për t’u prekur nga demenca. Ky është konkluzioni i një studimi të realizuar nga Universiteti i Stokholmit dhe Instituti Karolinska në Suedi.
“Ky gjetje thekson se ambienti i afërt rreth banesës përbën një element të rëndësishëm për të krijuar kushtet që ndihmojnë shëndetin e trurit dhe një plakje të shëndetshme”, deklaron Cecilia Stenfors, udhëheqëse e kërkimit dhe një nga autorët kryesorë të studimit.
Studimi, i publikuar në revistën shkencore “Alzheimer’s & Dementia”, përfshiu rreth 3,000 pjesëmarrës, të cilët u ndoqën për 16 vjet. Hulumtuesit hartëzuan sasinë e bimësisë përreth banesave të tyre dhe ndoqën shëndetin e tyre njohës, si dhe shfaqjen e demencës gjatë kësaj periudhe.
Rezultatet treguan se banimi pranë zonave të gjelbërta mund të ketë një efekt mbrojtës kundër demencës. Lidhja ishte më e fortë për bimësinë që ndodhej më afër shtëpisë, brenda një rrezeje prej 100 metrash, ndërsa dobësohej sa më shumë të rritej distanca nga zonat e gjelbërta.
Si ndikon bimësia në shëndetin e trurit?
Hulumtuesit identifikuan disa mënyra përmes të cilave zonat e gjelbërta mund të ndikojnë në rrezikun për demencë. Këto përfshijnë uljen e stresit dhe nxitjen e zakoneve të shëndetshme, si gjumi më cilësor, aktiviteti fizik, ndërveprimi shoqëror dhe forcimi i lidhjeve mes njerëzve.
“Ambientet natyrore dhe bimësia mund të ndihmojnë në rikuperimin psikologjik, të ulin stresin dhe të rrisin ndjenjën e mirëqenies”, shpjegon Stenfors.
Zonat e gjelbërta mund të ofrojnë përfitime edhe duke i mbrojtur njerëzit nga faktorë të dëmshëm mjedisorë, si zhurma e trafikut, ndotja e ajrit dhe temperaturat ekstreme.
Pse është i rëndësishëm planifikimi i qyteteve?
Në vitin 2025, rreth 9 milionë njerëz në Bashkimin Europian jetonin me demencë. Sipas parashikimeve, deri në vitin 2050, kjo shifër pritet të kalojë 14 milionë.
Për autorët e studimit, rritja e numrit të personave të prekur e bën të domosdoshëm shqyrtimin e strategjive të reja, përfshirë planifikimin e qëndrueshëm urban që merr parasysh shëndetin e trurit.
“Shëndeti i trurit duhet të merret në konsideratë kur planifikojmë dhe zhvillojmë qytetet dhe zonat e banimit”, thotë Stenfors. Ajo shton se bimësia pranë banesave mund të shërbejë si një burim i përbashkët për shëndetin publik, përshtatjen ndaj ndryshimeve klimatike dhe ruajtjen e biodiversitetit.
Për këtë arsye, hulumtuesit theksojnë rëndësinë e mbrojtjes së bimësisë ekzistuese dhe krijimit të zonave të gjelbërta që janë të arritshme dhe të përdorshme për njerëz me nevoja dhe aftësi të ndryshme.
Burimi: anabelmagazine.com
