Këngëtarja Jonida Maliqi ka ndarë një rrëfim mjaft personal në emisionin “Goca dhe Gra”, ku ka folur hapur për rrugëtimin e të birit, Danit, i cili është diagnostikuar me çrregullimin e spektrit të autizmit.
Momentet e vështira të pranimit
Gjatë intervistës në Top Channel, Jonida ka rikthyer momentet e vështira që ka përjetuar që kur kuptoi se djali i saj kishte nevoja të ndryshme nga bashkëmoshatarët. Ajo ka treguar se pranimi i situatës nuk ishte i lehtë, ndërsa një nga përvojat më të dhimbshme për të mbetet takimi i parë me një psikologe në fund të vitit 2015.
Sipas këngëtares, gjatë konsultës së parë, ajo dhe babai i Danit u përballën me një komunikim tepër të ashpër. Psikologia u kishte thënë se nuk ishin prindër të denjë dhe se djali i tyre nuk do të arrinte kurrë të fliste apo të socializohej. Një deklaratë që, siç rrëfen Jonida, e tronditi thellë.
Përparimi dhe qëndrimi ndaj profesionistes
Më pas, familja iu drejtua një qendre tjetër, ku me mbështetjen e një ekipi prej pesë mjekësh, Dani nisi të përparonte ndjeshëm. Sot ai ndjek shkollën dhe komunikon në dy gjuhë.
Gjatë bisedës, Maliqi nuk i kurseu as fjalët për psikologen Anjeza Dishnica, duke kritikuar mënyrën se si ishte komunikuar me ta në atë periudhë.
“Turp të kesh, sepse një prindi, sido që të jetë fëmija i vet, nuk i komunikohet në këtë mënyrë”, u shpreh ajo, duke shtuar se një profesionist duhet të tregojë kujdes dhe ndjeshmëri në situata të tilla.
Marrëdhënia me ish-bashkëshortin
Jonida foli gjithashtu për marrëdhënien me ish-bashkëshortin dhe procesin gjyqësor pas ndarjes. Ajo tregoi se fillimisht kishin synuar ta mbanin gjithçka private, por çështja përfundoi në gjykatë dhe më pas u bë publike përmes medias.
Këngëtarja theksoi se për momentin ia ka lënë çështjen drejtësisë, ndërsa prioriteti i saj mbetet mirëqenia e të birit. Ajo u shpreh se ka bërë përpjekje të vazhdueshme për të gjetur një mënyrë komunikimi me ish-partnerin dhe shpreson që në të ardhmen të arrihet një zgjidhje.
Forca e mëmësisë
Në fund, Jonida pranoi se mëmësia i ka zbuluar një forcë që nuk e dinte se e kishte, duke e cilësuar Danin si njeriun që e ka bërë të ndihet më e plotë.
“Dani më ka përsosur si qenie”, u shpreh ajo, duke treguar edhe një herë lidhjen e veçantë me të birin.
Burimi: bordo.al
