Një debat i fortë, me akuza dhe deklarata tronditëse, ka përfshirë spektaklin e mbrëmshëm të Big Brother VIP Kosova 5. Në qendër të vëmendjes ishin Jona Krasniqi, Doresa dhe Lejla Hoxha, të cilat u përballën për herë të parë drejtpërdrejt lidhur me polemikat e fundit për bullizimin dhe komentet fyese që kanë qarkulluar në rrjet.
Përballja mes Jonës dhe Doresës
Për të sqaruar situatën, Doresa u lidh përmes një komunikimi nga Gjermania, ndërsa Lejla Hoxha hyri në shtëpinë e BBVK-së, ku u zhvillua një diskutim i tensionuar për marrëdhëniet mes vajzave dhe deklaratat e bëra në të kaluarën.
Përplasja nisi pasi Jona kundërshtoi akuzat e Doresës. Ajo pranoi se kishte mbajtur komente ndaj disa influencereve, por mohoi të kishte ushtruar bullizim ndaj saj. Madje, Jona pretendoi se edhe Doresa e kishte bullizuar për një periudhë prej tre deri në katër muajsh.
Por ky qëndrim nuk u prit aspak mirë nga Doresa, e cila reagoi ashpër, duke e akuzuar Jonën se i kishte shkaktuar vuajtje dhe duke vënë në pikëpyetje edhe deklaratat e saj për feminizmin.
“Ti s’je feministe, ti më ke bullizuar, ti ma ki nxi jetën”, iu drejtua ajo Jonës.
Rrëfimi emocional i Doresës
Megjithatë, momenti që tërhoqi më shumë vëmendje ishte rrëfimi i Doresës për ndikimin që, sipas saj, bullizimi kishte pasur në jetën e saj. Me emocione të forta, ajo bëri një deklaratë që e çoi përplasjen në një tjetër nivel.
“Ma ki nxi jetën, s’kom dashtë me jetu pas atyre bullizimeve”, u shpreh Doresa, duke folur për periudhën e vështirë që pretendon se ka kaluar.
Pa pajtim
Pavarësisht akuzave të ndërsjella dhe përballjes së drejtpërdrejtë, situata nuk përfundoi me një pajtim. As Jona dhe as Doresa nuk kërkuan falje, duke mbetur secila në qëndrimet e veta.
Kështu, një tjetër çështje e diskutuar prej ditësh në rrjetet sociale u kthye në një nga momentet më të komentuara të mbrëmjes në BBVK 5.
Burimi: bordo.al
