Pjesa e dytë e kësaj të ashtuquajturës protestë që solli djegien e Tiranës ka sjellë një gjendje politike mjaft komplekse dhe të çuditshme. Përveç Berishës, që është një dashnor i vjetër i molotovit, të gjithë të tjerët që janë pjesë e protestës nuk po distancohen nga barbaria që i ndodhi Tiranës.
Qëndrimi i partive në Evropë dhe tek ne
Në të gjitha vendet evropiane ku janë zhvilluar protesta të dhunshme që kanë sjellë djegien e qyteteve, partitë politike dhe aktorët e tjerë kanë qenë të qartë: jo dhunës. Tek ne, kjo qartësi nuk ekziston. Jo vetëm Sali Berisha, por edhe të gjithë aktorët politikë që e mbështesin aksionin e protestave nuk e kanë bërë këtë deklarim. Ky është një fenomen politik që e dallon logjikën e veprimit të pothuajse të gjithë mbështetësve të protestave.
Retorika e tyre shkon te një logjikë sipas së cilës djegia e Tiranës ndodhi sepse Edi Rama nuk i dëgjoi gjatë protestës paqësore të flamingove.
Iluzioni i protestës së flamingove
Në të vërtetë, e gjithë kjo është një iluzion. Protesta e flamingove nuk ishte një lëvizje e nisur nga aktorë vendas, por nga faktorë përtej oqeanit, si një operacion marketingu.
Pyetja që lind natyrshëm është pse nuk e thonë këtë hapur. Duket se palët duan vetëm të fitojnë simpatinë e atyre që e mbështesin një qëndrim radikal, një akt të fortë kundër Edi Ramës, për ta rrëzuar, dobësuar apo dëmtuar.
Logjika pragmatiste dhe alternativa politike
Kjo është një logjikë pragmatiste për t’u afruar me masën që nuk e do Edi Ramën, që e urren qeverinë dhe kërkon ta heqë këtë maxhorancë nga pushteti. Por a mund të frymëzojë një politikë ndjekësit e saj të djegin vendin nëse qeveria nuk rrëzohet?
Problemi i kundërshtarëve të kësaj qeverie nuk ka rrugë tjetër veçse kanalizimin politik të një alternative që mund ta mundë qeverinë në zgjedhje.
Rrëzimi i befasishëm i një qeverie me dhunë nuk ka ndodhur as në 1998, aq më pak tani, kur Shqipëria është anëtare e NATO-s dhe kandidate për anëtarësim në Bashkimin Evropian. Shqipëria e 2026 nuk është ajo e 1991-shit.
Burimi: shqiptarja.com
