Në Asamblenë Kombëtare Socialiste, ish-kryeministri Pandeli Majko mbajti një fjalë ku kërkoi pastrimin e PS-së nga ata persona me lidhje të papërshtatshme me botën e krimit të organizuar, dhe kërkoi një kandidaturë serioze për Bashkinë e Tiranës.
Një burim nga asambleja i tha Top Channel-it se zoti Majko shkëmbeu batuta me Ramën gjatë fjalës, por theksoi nevojën për një Parti Socialiste të shëndetshme.
Kërkesa për pastrimin e partisë
Majko citohet të ketë deklaruar se:
“Duhet të marrim në konsideratë edhe çfarë mund të bëjë SPAK deri në maj, kur janë zgjedhjet lokale.
Ish-kryeministri socialist ka qenë i drejtpërdrejtë në kërkesën drejtuar Ramës dhe Asamblesë.
“Kush nga anëtarët e familjes tonë ka pasur kontakte të papërshtatshme me krimin e organizuar dhe diskredituese duhet të largohet menjëherë për të mos i dhënë kosto Partisë Socialiste”, deklaroi Majko.
“E them këtë pasi u bë publike ekzistenca në duart e SPAK-ut të 1000 orëve filmime, të cilat mund të jenë kompromentuese për persona të caktuar brenda partisë sonë”, citohet të ketë thënë Majko gjatë mbledhjes së Asamblesë një ditë më parë.
Shqetësimi për Bashkinë e Tiranës
Majko ngriti edhe një shqetësim tjetër lidhur me Bashkinë e Tiranës.
“Në kushtet që jemi, rrezikojmë ta humbim Bashkinë e Tiranës. Duhet të gjejmë një kandidat me potencial dhe fitues”, u shpreh Majko.
Përgjigja e Ramës
Më pas mori fjalën kryeministri Rama, i cili i u përgjigj.
“Skepticizmi i përhershëm i Majkos më ka motivuar mua të bëj zgjedhjet e duhura dhe kështu do të ndodhë edhe këtë herë me Tiranën”.
Burimi: lajmifundit.al
