Kalo te përmbajtja

Lajme të shpejta, të verifikuara dhe të paanshme

Lajm i fundit
Politikë

Prokuroria heton plumbat e gomës, 20 kallëzime në protestë

Prokuroria heton plumbat e gomës, 20 kallëzime në protestë
Foto: lajmifundit.al

Prokuroria e Tiranës ka nisur ftesat për qytetarët që mbetën të dëmtuar gjatë protestave në Tiranë, me qëllim marrjen e rrëfimit të tyre mbi mënyrën se si u plagosën me plumba gome.

Ftesat dhe dëshmitarët e parë

Nga lista e katër shtetasve, tre prej tyre janë dëmtuar në bark dhe një në sy. I pari që do të pyetet është Erion Vishkulli, i cili u plagos në sy dhe, pas ndërhyrjeve në Itali, është kthyer në Shqipëri.

I riu ka marrë ftesë për t’u pyetur më 25 nëntor, ora 11:00.

Procesi vazhdon pa letërporosinë italiane

Italianët nuk kanë sjellë ende letërporosinë, përmes së cilës do të konfirmohet zyrtarisht nëse i 28-vjeçari u plagos me plumb gome. Për këtë arsye, akuza vazhdon me veprime të tjera.

Një prej tyre është kërkesa për të administruar identitetin e oficerëve që kishin të drejtë të përdornin armë me plumba gome, vendosjet e tyre dhe planin e masave për protestat.

Gjykata dhe kallëzimet

Në gjykatë numri i të arrestuarve ka kaluar 300. Për përqindjen më të madhe të tyre, gjykata ka vendosur masën e detyrimit me paraqitje.

Prokuroria ka bashkuar 20 kallëzime të qytetarëve që pretendojnë se u dhunuan dhe se ndaj tyre u kryen veprime arbitrare.

Deklaratat e ministrit të Brendshëm

Më herët, ministri i Brendshëm Ervin Demo deklaroi se gjatë ditëve të protestave të dhunshme u dëmtuan 200 punonjës policie dhe 107 protestues. Ai tha gjithashtu se organizatorët e protestës kishin përdorur të mitur në veprimet e dhunshme kundër policisë dhe institucioneve.

Si argument, ministri përmendi shifrën prej 269 shtetasve të shoqëruar që ishin nën moshën 18 vjeç.

Burimi: lajmifundit.al

Të fundit Të gjitha