Sipas të dhënave që Ministria e Shëndetësisë dhe Mirëqenies Sociale publikoi të hënën, përplasjet e dhunshme që ndodhën të dielën, më 18 tetor, në Tiranë mes protestuesve dhe forcave të policisë shkaktuan të paktën 36 persona të lënduar.
Nga totali i të lënduarve, 31 persona kërkuan ndihmë mjekësore në Spitalin Universitar të Traumës, ndërsa pesë të tjerë u paraqitën në Qendrën Spitalore Universitare “Nënë Tereza”, QSUT.
Ministria njoftoi se në Spitalin e Traumës ndihmë morën 21 punonjës policie, pesë protestues, katër kalimtarë dhe një përfaqësuese e medias, e cila u shtrua në spital.
Aktualisht, dy protestues vazhdojnë të qëndrojnë në Spitalin e Traumës për ekzaminime dhe konsulta mjekësore.
Në QSUT u paraqitën pesë persona të tjerë të lënduar, përfshirë dy punonjës policie dhe tre protestues.
Ministria shtoi gjithashtu se që nga fillimi i protestave më 13 tetor, 14 persona vazhdojnë të marrin trajtim spitalor. Mes tyre janë pesë punonjës policie, katër protestues, katër kalimtarë dhe një përfaqësuese e medias. Autoritetet shëndetësore raportojnë se gjendja e tyre është e mirë.
Burimi: www.reporter.al
