Gert Jan Koopman, drejtori i Përgjithshëm për Negociatat me Vendet e Fqinjësisë dhe Zgjerimin në Komisionin Evropian, ka folur për çështjen e statusit të vendit kandidat për Kosovën në rrugën drejt anëtarësimit në Bashkimin Evropian.
Shqyrtimi i aplikimit
Zyrtari kyç për politikat e zgjerimit në BE ka thënë se ai “personalisht beson” se duhet të fillohet me shqyrtimin e aplikimit të Kosovës, i cili është dorëzuar në dhjetor të vitit 2022.
“Personalisht, besoj se është shumë e rëndësishme që të fillojmë shqyrtimin e aplikimit të saj. Mendoj se, siç e dini, pesë shtetet që nuk e njohin Kosovën janë hezituese. Por nuk bëhet fjalë vetëm për këto pesë shtete. Ka pasur gjithashtu probleme në veri të vendit dhe tani është rikthyer çështja e Dhomave të Specializuara”, ka deklaruar ai.
Ligji për Dhomat e Specializuara
Koopman e ka vlerësuar si “jashtëzakonisht të padobishme” çështjen e ligjit për Dhomat e Specializuara, duke thënë se Kosova duhet të “dëshmojë plotësisht përkushtimin e saj ndaj rrugës evropiane”.
“E kuptoj se sot është miratuar një ligj. Kjo është jashtëzakonisht e padobishme. Unë do ta shihja çështjen në mënyrë të kundërt: për shkak se kemi një situatë delikate institucionale, me pesë shtete që nuk e njohin Kosovën, vendi në të gjitha këto çështje të tjera duhet vërtet të tregojë dhe të dëshmojë plotësisht përkushtimin e tij ndaj rrugës evropiane”, ka shtuar ai.
Më tej, ai ka thënë se ligji për Dhomat e Specializuara “nuk duhet të miratohet”, dhe se “situata në veri të vendit duhet të menaxhohet siç duhet”.
“Kjo do të thotë të mos miratohet ligji për Dhomat e Specializuara dhe të sigurohet që situata në veri të vendit të menaxhohet siç duhet. Mendoj se, nëse kjo bëhet, është plotësisht e realizueshme që Këshilli i Bashkimit Evropian ta ftojë Komisionin Evropian të fillojë punën për aplikimin dhe të japë një opinion, që është hapi i ardhshëm. Më pas, i takon Këshillit të vendosë nëse Kosovës do t’i jepet apo jo statusi i vendit kandidat”, ka vijuar ai.
Hapat e ardhshëm
Në fund, Koopman ka thënë se nuk duhet të jetë “shumë e vështirë” që Kosovës t’i jepet statusi i vendit kandidat, me kusht që vendi t’i përmbushë kërkesat e lartpërmendura. Megjithatë, ai ka shtuar se “ende nuk jemi në atë pikë”.
“Kosova është partnere në procesin e zgjerimit dhe financimi i saj vjen nga një instrument që quhet Instrumenti për Ndihmën e Para-Anëtarësimit (IPA). Prandaj, nuk mendoj se duhet të jetë shumë e vështirë që vendet t’i japin Kosovës statusin e vendit kandidat, me kusht që ajo t’i përmbushë të gjitha këto kërkesa. Por ende nuk jemi në atë pikë”, ka thënë Koopman për Atlantic Council Europe Center.
Burimi: euronews.al
