Riakreditimi dhe Strategjia 2035+
Proceset e riakreditimit dhe Strategjia e re e Arsimit 2035+ ishin në qendër të takimit që ministri i Arsimit dhe Shkencës, Hajrulla Çeku, zhvilloi me drejtuesit e Këshillit Shtetëror të Cilësisë (KShC), të Agjencisë së Kosovës për Akreditim (AKA) dhe me përfaqësuesen e Konferencës së Rektorëve.
Në këtë takim ishin edhe sekretari i përgjithshëm i Ministrisë, Naim Gashi; kryetari i KShC-së, Avni Berisha; ushtruesi i detyrës së drejtorit të AKA-së, Arianit Krasniqi; si dhe Alma Shehu, përfaqësuese e Konferencës së Rektorëve dhe prorektore e Universitetit “Haxhi Zeka”.
Marrëveshja për riakreditimin
Ministria e Arsimit dhe Shkencës njoftoi se palët ranë dakord që riakreditimi i institucioneve dhe i programeve të studimit të përputhet me Strategjinë e re të Arsimit 2035+, e cila po hartohet.
Sipas njoftimit të Ministrisë, strategjia synon ta lidhë drejtpërdrejt zhvillimin dhe ristrukturimin e arsimit të lartë me prioritetet zhvillimore të vendit dhe kërkesat e tregut të punës.
Bashkëpunimi mes institucioneve
Gjatë diskutimit u nënvizua edhe nevoja për bashkëpunim të ngushtë mes ministrisë, AKA-së dhe universiteteve, në mënyrë që sistemi i arsimit të lartë të jetë cilësor, konkurrues dhe i integruar në Hapësirën Evropiane të Arsimit të Lartë.
Burimi: www.albeu.com
