Amnesty International deklaroi të hënën se rritja e gjerë e dhunës nga kolonët izraelitë, e mbështetur nga shteti, ka për qëllim “pastrimin etnik” të palestinezëve nga Bregu Perëndimor i pushtuar, duke theksuar se këto sulme nuk përbëjnë incidente të veçanta, por një “politikë thelbësore të shtetit izraelit”.
Organizata për të drejtat e njeriut me qendër në Londër u bëri thirrje vendeve të vendosin sanksione ndaj zyrtarëve izraelitë të përfshirë në shkelje të rënda të së drejtës ndërkombëtare, të ndalojnë tregtinë me vendbanimet e paligjshme izraelite dhe të ndërpresin furnizimin me armë dhe pajisje sigurie për Izraelin.
Deklarata erdhi pas sulmeve të kryera ditët e fundit nga kolonët izraelitë ndaj fermerëve palestinezë në Bregun Perëndimor, si dhe ndaj diplomatëve evropianë dhe një fotoreporteri amerikan që punon për gazetën “The Washington Post”.
“Amnesty International ka kohë që paralajmëron për rritjen e jashtëzakonshme të dhunës së kolonëve kundër palestinezëve, të nxitur nga shteti, e cila, përmes mjeteve që ngjallin terror, synon pastrimin etnik të palestinezëve nga Bregu Perëndimor i pushtuar”, tha Heba Morayef, drejtoreshë rajonale e Amnesty International për Lindjen e Mesme dhe Afrikën e Veriut.
“Kjo rritje e dhunës është nxitur nga dështimi i vazhdueshëm i bashkësisë ndërkombëtare për të ndërmarrë veprime kuptimplota kundër vetë sistemit që mundëson shtypjen e vazhdueshme të palestinezëve”, shtoi ajo.
“Sulmet nuk janë akte të izoluara, por një politikë qendrore e shtetit izraelit”, tha Morayef.
Ajo u bëri thirrje shteteve të ndërmarrin masa konkrete për të përmbushur detyrimet e tyre sipas së drejtës ndërkombëtare dhe për të shmangur bashkëfajësinë në shkeljet dhe krimet kundër palestinezëve.
Amnesty International kërkoi t’u jepet fund të gjitha formave të tregtisë, investimeve dhe bashkëpunimit “që kontribuojnë në ruajtjen e pushtimit të paligjshëm, aparteidit dhe fushatës së vazhdueshme të pastrimit etnik”.
Morayef kritikoi gjithashtu përpjekjet e zyrtarëve të lartë izraelitë dhe kandidatëve në zgjedhje nga i gjithë spektri politik për t’i paraqitur sulmet e kolonëve “si vepër të disa individëve”.
Ajo i cilësoi këto paraqitje si shtrembërim të rëndë të së vërtetës, duke pasur parasysh “brutalitetin e sponsorizuar nga shteti”.
“Këto sulme duhet të nxisin një reagim të fortë nga shtetet që pretendojnë se kundërshtojnë aneksimin e territorit palestinez nga Izraeli”, shtoi ajo.
Burimi: abcnews.al
