Ndërsa protesta para Kryeministrisë vazhdonte paqësisht, efektivët e Policisë së Shtetit filluan të shoqërojnë disa nga protestuesit. Ndërhyrja e policisë u kundërshtua nga qytetarët e pranishëm, të cilët reaguan me thirrjen: „Policia e krimit!“.
Një ditë më parë, më 14 nëntor, studentët dhe qytetarët organizuan protestën kombëtare, e cila filloi rreth orës 14:00 para Ministrisë së Arsimit. Pas qëndrimit në këtë institucion, protestuesit marshuan nëpër disa rrugë të kryeqytetit, duke kaluar nga Zogu i Zi dhe zona e 21 Dhjetorit, dhe më pas u kthyen në Bulevardin „Dëshmorët e Kombit“, para Kryeministrisë.
Incidentet gjatë marshimit
Gjatë marshimit nuk mungonin incidentet. Disa protestues dogjën kosha mbeturinash, dëmtuan tabela reklamuese dhe stacione autobusësh, ndërsa në zonën e Zogut të Zi qarkullimi u bllokua për disa minuta.
Ndërhyrja e policisë
Më vonë, pranë godinës së Kryesisë së Kuvendit, pati hedhje gurësh dhe tentativë për të dëmtuar hyrjen e institucionit. Policia ndërhyri dhe shoqëroi disa nga pjesëmarrësit.
Burimi: www.balkanweb.com
