TIRANË, 4 nëntor (ATSH) – Ministri për Evropën dhe Punët e Jashtme, Ferit Hoxha, mori pjesë në konferencën ndërkombëtare “Zgjerimi i BE-së: Vlerësimi i koncepteve të reja dhe perspektiva për vitin 2027”, e organizuar nga Këshilli Gjerman për Marrëdhëniet me Jashtë (DGAP).
Zgjerimi si domosdoshmëri strategjike
Gjatë fjalës së tij, Hoxha theksoi se realitetet gjeopolitike e kanë bërë zgjerimin një domosdoshmëri strategjike dhe sigurie për Evropën. Sipas tij, kjo nuk mund të ndodhë në kurriz të përmbajtjes dhe standardeve, sepse reformat mbeten po aq të domosdoshme sa më parë.
“Ne nuk po bëjmë reforma thjesht për t’u bërë evropianë, por sepse jemi evropianë dhe sepse qytetarët tanë meritojnë institucione që funksionojnë sipas standardeve evropiane”, nënvizoi Hoxha.
Anëtarësimi fitohet me meritë
Shqipëria, sipas Ministrit të Jashtëm, nuk kërkon rrugë të shkurtër drejt anëtarësimit në BE.
“Anëtarësimi në BE fitohet me meritë, nuk dhurohet si akt solidariteti. Fitohet reformë pas reforme, kapitull pas kapitulli, standard pas standardi, duke ndërtuar institucione funksionale, demokratike dhe të përgjegjshme, për të cilat Shqipëria ka nevojë për veten e saj dhe që anëtarësimi në BE kërkon. Shqipëria po bën pikërisht këtë: reforma, zbatim, llogaridhënie dhe vlerësim mbi bazën e meritës. Por një proces i bazuar në meritë duhet të funksionojë në të dyja drejtimet. Kur vendet kandidate japin rezultate, Evropa duhet të përgjigjet. Kur reformat sjellin rezultate, ato duhet të përkthehen në progres konkret.
Sepse zgjerimi nuk ka të bëjë thjesht me një Bashkim Evropian më të madh. Ka të bëjë me një Evropë më të fortë, më të sigurt dhe, më në fund, të bashkuar plotësisht”, përfundoi Ministri.
/a.f/
Burimi: ata.gov.al
