Pasi pësoi një disfatë të rëndë në shtëpi ndaj Lazios, drejtuesit e Juventusit konfirmuan se Luciano Spalletti do të vijojë punën si trajner, edhe pse klubi pret një reagim të menjëhershëm në ndeshjet e ardhshme kundër Rennes në Europa League, si dhe në ato të kampionatit me Lecce dhe Genoa.
Gjatë diskutimeve mes pronarëve dhe drejtuesve, situata u analizua në të gjitha aspektet, duke marrë parasysh edhe skenarin më negativ në rast se ky rikuperim i kërkuar nuk ndodh. Nëse gjendja bëhet e pakthyeshme brenda një afati të shkurtër, tifozët do të pranonin vetëm emrin e Antonio Contes, një lëvizje që ndërlikon planet e klubit, pasi ata nuk parashikojnë kthimin e tij në këtë fazë.
Si zgjidhje e përkohshme po përmendet emri i Stefano Piolit, i cili, si ish-lojtar i bardhezinjve, ka shënuar 62 paraqitje dhe 4 trofe mes viteve 1984 dhe 1987. Një emërim i mundshëm i Piolit mund të shërbejë vetëm si një tranzicion, duke çuar drejt një revolucioni të ri gjatë verës së ardhshme.
Përveç rastit të një marrëveshjeje me Conte, klubi do të arrinte në vitin 2027 me nevojën për një trajner të ri rreth të cilit do të ndërtohet projekti i ri sportiv, ku pëlqehen veçanërisht Simone Inzaghi dhe Francesco Farioli.
Ish-trajneri i Interit ndodhet në sezonin e tij të dytë te Al Hilal dhe mund të dëshirojë rikthimin në Evropë pas përfundimit të kontratës në fund të këtij sezoni, ndërsa Farioli, aktualisht në krye të Portos, mund të ketë eksperiencën e tij të parë si trajner kryesor në Itali pas sezoneve pozitive te Nice dhe Ajax.
Së fundmi, vëmendje i kushtohet edhe Vincenzo Italianos, i cili në të kaluarën ishte pranë Milanit dhe Napolit, por që aktualisht ka një kontratë me Besiktasin deri në vitin 2028 dhe mund të tundohet nga një ftesë e Juventusit.
Burimi: www.cna.al
