Prodhimi i ri i “Dirty Dancing” synon të nderojë trashëgiminë e Patrick Swayze, pa përdorur inteligjencën artificiale për ta rikthyer atë në ekran. Producentja Nina Jacobson theksoi se një nga sfidat kryesore të këtij projekti është t’i ofrojë audiencës mundësinë për të ripërjetuar emocionet që lidhen me personazhin e tij.
Filmi origjinal, i dalë në vitin 1987, prezantoi historinë e dashurisë midis Johnny Castle, të interpretuar nga Swayze, dhe Frances “Baby” Houseman, rol që e bëri të famshme Jennifer Grey. Aktori ndërroi jetë në vitin 2009, në moshën 57-vjeçare, pas një beteje me kancerin e pankreasit.
“Një nga aspektet ku duhet të përqendrohesh vërtet është se si t’i lejosh njerëzit të mbajnë zi për të përmes një filmi”, deklaroi Jacobson gjatë një paneli në samitin Future of Filmmaking 2026, më 17 tetor. Producentja sqaroi se ekipi nuk synon ta rikthejë aktorin përmes AI-së.
Vazhdimi do të sjellë sërish Jennifer Grey në rolin e Baby, ndërsa pjesa tjetër e kastit do të përbëhet nga aktorë të rinj. Detajet e historisë mbeten ende të fshehta, por Jacobson ka bërë të ditur se qëllimi është të rikrijohet atmosfera që përcolli filmi i parë, pa imituar atë që e bëri atë të veçantë.
“U desh kohë për të gjetur njerëzit e duhur, të cilëve mund t’u besohej vazhdimi i trashëgimisë së filmit origjinal”, u shpreh më parë Grey, duke konfirmuar entuziazmin e saj për t’u rikthyer në këtë projekt.
Aktorja kishte theksuar edhe më herët se askush nuk mund ta zëvendësojë një person që nuk jeton më dhe se magjia e filmit të parë nuk mund të përsëritet. Sipas saj, historia e re duhet të sjellë diçka të ndryshme, duke ruajtur njëkohësisht emocionet që e shndërruan “Dirty Dancing” në një fenomen kulturor.
Filmi origjinal u vlerësua jo vetëm për kiminë mes dy protagonistëve, por edhe për kolonën zanore të suksesshme. Kënga “(I’ve Had) The Time of My Life” fitoi çmimin Oscar për këngën më të mirë origjinale.
Burimi: bordo.al
