Princi Harry ka bërë të ditur se dëshiron të përmirësojë lidhjet me babanë e tij, Mbretin Charles III, dhe me vëllain, Princin William, duke nënvizuar se pajtimi është më i rëndësishmi në një periudhë kur bota përballet me shumë sfida.
Në një bisedë për revistën “GQ”, e cila u realizua në New York, Harry theksoi se pavarësisht tensioneve të së shkuarës, ai synon që marrëdhëniet familjare të përmirësohen.
“Ka njerëz që nuk dëshirojnë që gjërat të zgjidhen. Unë dëshiroj që ato të zgjidhen. Duke pasur parasysh gjithçka që po ndodh në botë, pajtimi është gjëja më e rëndësishme”, u shpreh ai.
Duka i Sussex-it shtoi se, edhe pse plagët e së shkuarës mund të vazhdojnë për një kohë të gjatë, mënyra se si njerëzit i përballojnë ato dhe aftësia për të vazhduar përpara janë thelbësore.
“Plagët mbeten përgjithmonë. Por mënyra se si i shihni ato dhe qëndrimi që mbani ndaj asaj që ka ndodhur, si dhe aftësia për ta lënë të shkuarën pas, janë gjëra që do t’i këshilloja kujtdo”, tha Harry.
Megjithatë, një zëdhënës i çiftit Sussex ka bërë të qartë se deklarata e tij se “ka njerëz që nuk dëshirojnë që gjërat të zgjidhen” nuk ishte një mesazh i drejtuar kundër Princit William apo ndonjë anëtari tjetër të familjes mbretërore. Sipas tij, intervista ishte regjistruar në fund të shtatorit, ndërsa vendimi për kohën e publikimit i takonte revistës.
Marrëdhëniet mes Harry-t dhe familjes mbretërore janë përkeqësuar prej vitesh, veçanërisht pas vendimit të tij dhe Meghan Markle për t’u larguar nga Mbretëria e Bashkuar në vitin 2020 dhe për të hequr dorë nga detyrat e tyre si anëtarë aktivë të familjes mbretërore. Konfliktet u bënë edhe më të njohura pas publikimit të librit të tij me kujtime, “Spare”, ku Harry zbuloi detaje mbi përplasjet familjare dhe marrëdhënien e vështirë me të vëllanë.
Edhe pse tashmë ndodhet më pranë familjes së tij në Mbretërinë e Bashkuar, marrëdhënia mes dy vëllezërve nuk duket se ka përparuar ndjeshëm. Megjithatë, deklaratat e fundit të Harry-t tregojnë se ai është i gatshëm të lërë pas të shkuarën dhe të përpiqet për një afrim.
Ai kishte shprehur të njëjtën dëshirë edhe në një intervistë për BBC-në në maj të vitit 2025, kur foli për rëndësinë e pajtimit dhe për ndikimin që kanë konfliktet familjare te njerëzit.
Sipas Harry-t, mosmarrëveshjet mes vëllezërve dhe motrave, si dhe marrëdhëniet e vështira mes prindërve dhe fëmijëve, janë probleme me të cilat përballen shumë familje.
Gjatë intervistës, princi foli edhe për arsyet që e kanë afruar sërish me Mbretërinë e Bashkuar. Ai tha se mundësia që fëmijët e tij, Archie dhe Lilibet, të përjetojnë jetën në Britani dhe të ndjekin një shkollë britanike ka një rëndësi të veçantë për të.
“Ata po e shijojnë shumë dhe kjo po u jep një përvojë krejtësisht të ndryshme”, tha Harry, duke shtuar se dëshiron të kalojë më shumë kohë në Mbretërinë e Bashkuar dhe të jetë më pranë familjes së tij.
Princi foli gjithashtu për gjendjen shëndetësore të të atit, Mbretit Charles III, i cili po trajtohet për kancer. I pyetur për shëndetin e tij, Harry u përgjigj shkurt: Ai po bëhet më mirë.
Një tjetër temë e intervistës ishte humbja e nënës së tij, Dianës, Princeshës së Uellsit, e cila humbi jetën në vitin 1997. Harry tregoi se me kalimin e kohës ka mësuar ta mbajë kujtimin e saj si pjesë të jetës dhe punës së tij, pa lejuar që dhimbja ta pengojë të ecë përpara.
“Më pëlqen fakti që tani mund ta mbaj kujtimin e nënës sime me vete përmes punës sime, në vend që kjo dhimbje të më rëndojë apo të më mbajë të lidhur pas së shkuarës”, u shpreh ai.
Në fund, Harry theksoi se nuk kërkon mëshirën e publikut, duke shpjeguar se ka pasur mbështetjen e njerëzve të afërt dhe ka ndjekur forma të ndryshme terapie për t’u përballur me vështërsitë e jetës.
“Kam një rrjet mbështetësish rreth meje, kam ndjekur forma të ndryshme terapie dhe kam bërë përpjekjet e mia për t’u përballur me gjërat. Ndonjëherë pyes veten se ku do të isha sot nëse nuk do t’i kisha bërë këto gjëra. Situata mund të ishte krejtësisht ndryshe”, përfundoi Princi Harry.
Burimi: www.gazetatema.net
