Kryetari i Partisë Mundësia, Agron Shehaj, ka rikthyer në qendër të vëmendjes diskutimet rreth ish-zëvendëskryeministres Belinda Balluku dhe vilës së saj në Palasë.
Duke iu referuar SPAK-ut, Shehaj pohon se vila nuk është ndërtuar dhe mobiluar me të ardhurat e Ballukut, por me mjete të personave që kanë përfituar nga tenderat e akorduar prej saj.
Ai thekson se bëhet fjalë për para të shqiptarëve, të cilat do të duhej të ishin investuar në sektorë kyçë si arsimi dhe shëndetësia, e jo për luksin e zyrtarëve të lartë.
“Neveri është ndjesia që provon çdo shqiptar që lexon luksin e shfrenuar të Belinda Ballukut”, shprehet Shehaj.
Ai nënvizon se, sipas pretendimeve të tij të bazuara në hetimet e SPAK-ut, vila në Palasë është financuar nga persona që kanë përfituar para përmes tenderave të Ballukut.
“Me paratë që duhet të shkonin në arsim e shëndetësi, që Belinda të ndihet e llastuar”, deklaron kreu i Partisë Mundësia.
Shehaj e ka përmbyllur reagimin me një mesazh të drejtpërdrejtë për kryeministrin Edi Rama, duke paralajmëruar se, sipas tij, koha e paprekshmërisë për zyrtarët e lartë po merr fund.
“Sot nuk ka më të paprekshëm, po u vjen fundi. Tani është radha e parave dhe vilave të Ramës”, shprehet Agron Shehaj.
Burimi: sot.com.al
