TIRANË, 20 tetor /ATSH/ Forcat Detare të Shqipërisë dhe të Turqisë kanë kryer një ushtrim të përbashkët në Gjirin e Vlorës dhe në Bazën Detare të Pashalimanit, si pjesë e aktivitetit të NATO-s “Neptune Strike 26-4”.
Në ushtrim morën pjesë anijet luftarake turke TCG Anadolu dhe TCG Gaziantep, mjete ajrore, si dhe Grupi i Bordingut Shqiptar.
Në njoftimin e Ministrisë së Mbrojtjes thuhet se aktiviteti synonte rritjen e gatishmërisë operacionale, bashkëpunimin dhe ndërveprueshmërinë për një NATO më të fortë e më të sigurt.
Neptune Strike 26-4 është një aktivitet i përbashkët ushtarak i NATO-s, që ka për qëllim të vlerësojë gatishmërinë luftarake dhe aftësinë e forcave aleate për të vepruar së bashku në operacione detare dhe shumëdimensionale.
/m.q/j.p/
Burimi: ata.gov.al
